Prezidentning “O‘zbekiston Respublikasi prezidentining yoshlar bilan ochiq muloqotida belgilangan vazifalarni amalga oshirishga doir chora-tadbirlar to‘g‘risida” gi farmoni qabul qilindi. Bu haqda Adliya vazirligi xabar berdi.
Farmonga ko‘ra, kreativ industriya parki hududlarda uning filiallari hamda ularda kreativ soha vakillarini o‘qitadigan biznes maktablari tashkil etiladi.
- 2025-yil 1-maydan 2031-yil 1-yanvargacha kreativ park rezidentlariga quyidagi soliq imtiyozlari joriy etiladi:
- ijtimoiy soliqni hamda jismoniy shaxslardan olinadigan daromad solig‘ini 50 foiz kamaytirilgan stavkada to‘laydi;
- tovarlarni (ishlarni, xizmatlarni) realizatsiya qilishdan olingan daromadi miqdoridan qatʼi nazar aylanmadan olinadigan soliq to‘lovchilar toifasiga kiritiladi. Bunda ular o‘z istagiga binoan umumbelgilangan soliq solish tartibiga o‘tishlari mumkin.
Bundan tashqari, xorijiy tillar bo‘yicha kamida C1 darajadagi milliy yoki unga tenglashtirilgan mos darajadagi xalqaro tan olingan sertifikatni olganiga 2 yildan oshmagan yoshlarga olis va borish qiyin bo‘lgan hududlarda chet tillariga ixtisoslashgan o‘quv markazlarini ochish uchun 6 oylik imtiyozli davr bilan 3 yil muddatga BHMning 320 baravarigacha (120 mln so‘mgacha) miqdorda foizsiz ssuda beriladi.
14-fevral kuni prezidentning yoshlar bilan muloqoti davomida O‘zbekistonda kreativ industriya parklari endi hududlarda ham barpo etilishi aytilgandi. Toshkent shahridagi “Yoshlar ijod saroyi”da namunaviy kreativ park tashkil qilingandi. Davlat rahbari endi kreativ industriya parklari hududlarda ham barpo etilishini aytgan edi.
Mamlakatda kreativ iqtisodiyot jadal rivojlanayotgan bo‘lib, sohada faoliyat ko‘rsatayotganlarning 98 foizini yoshlar tashkil etadi. Kreativ sanoat parklarini rivojlantirish uchun 2024-yilda 10 million dollar yo‘naltirildi.
Prezident 2023-yilda yoshlar o‘rtasida IT, reklama, kino, arxitektura, dizayn, marketing, hunarmandchilik, rassomchilik kabi yo‘nalishlarga qiziqish ortib borayotganini hisobga olib, viloyat hokimlariga bittadan kreativ park tashkil etishni topshirgandi.
Izoh (0)