Президент фармонига мувофиқ, 2025/2026-ўқув йилидан олий ҳарбий таълим муассасаларининг намунали курсантлари ва тингловчилари учун “Олий бош қўмондон” давлат стипендияси жорий этилади. Бу ҳақда Адлия вазирлиги хабар берди.
Ўқувчилар ўртасида муҳандислик-ихтирочилик йўналишида олимпиадалар ўтказиш йўлга қўйилади. Бунда ғолиб бўлган битирувчи ёшлар давлат олий таълим муассасаларининг олимпиада йўналишига мос ва турдош таълим йўналишларига имтиҳонларсиз қўшимча давлат гранти асосида ўқишга қабул қилинади.
Бундан ташқари, ёшларни илмга қизиқтирувчи, тарбиявий аҳамиятга эга ва умуммиллий қадриятларни шакллантиришга хизмат қилувчи миллий медиаконтентлар яратиш ҳамда энг яхши интеллектуал шоуларни ташкил этиш учун 100 млн сўмгача грантлар ажратилади.
Шунингдек, ёшларда табиатга муҳаббат ҳиссини уйғотиш, атроф-муҳитни муҳофаза қилишга қаратилган лойиҳаларни қўллаб-қувватлаш учун Ёшлар ишлари агентлиги ҳузурида юридик шахс мақомига эга бўлмаган “Яшил ташаббуслар”ни қўллаб-қувватлаш жамғармаси ташкил этилади. Мазкур жамғарма 10 млрд сўмгача миқдорда шакллантирилади.
2025 йилдан “Эл-юрт умиди” жамғармасининг янги стипендия йўналиши сифатида “Ёрқин истеъдод” лойиҳаси жорий этилиши ҳақида хабар берилганди.
Шунингдек, ушбу фармон билан 2025 йил 1 майдан 2031 йил 1 январгача креатив парк резидентларига солиқ имтиёзлари жорий этилади.
Изоҳ (0)