Toshkent shahrining Sergeli va Surxondaryo viloyatining Qumqo‘rg‘on tumanida energiya resurslaridan noqonuniy foydalanish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Sergeli tumanida YTT B.T. va boshqalar tijorat maqsadida “A.S.” MCHJga ijaraga bergan binosini tijorat maqsadida umumiy foydalanishdagi tarmoqqa yashirincha ulagan. Ular jami 289 mln so‘mlik elektr energiyasidan noqonuniy foydalanib kelgan.
Shuningdek, Qumqo‘rg‘on tumanidagi “J.F.” fermer xo‘jaligi rahbari F.A. xo‘jalik yer maydonini sug‘orishda umumiy foydalanishdagi elektr tarmog‘iga suv nasoslarini to‘g‘ridan-to‘g‘ri hisoblagichdan tashqari ulagan. Natijada jami 186,1 mln so‘mlik elektr energiyasidan noqonuniy foydalangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Izoh (0)