O‘zbekistonda 2024-yilda Raqobat qonunchiligi talablari buzilishi ortidan 200 mingdan ortiq iste’molchiga 50 milliard so‘mga yaqin mablag‘ qayta hisob-kitob qilingan. Bu haqda Raqobat qo‘mitasi matbuot xizmati xabar berdi.
Qo‘mita tomonidan narxlarning asossiz oshishining oldini olish, iste’molchilar huquqlarini himoya qilish va tabiiy monopoliya subyektlarini tartibga solish borasida bir qator tahlil va nazorat ishlari olib borilgan. 2024-yil davomida o‘tkazilgan o‘rganishlar natijasida Raqobat qonunchiligi talablari buzilgan 400 dan ortiq holat yuzasidan xo‘jalik yurituvchi subyektlarga nisbatan belgilangan tartibda ishlar qo‘zg‘atilgan. Olib borilgan ishlar va qo‘mita tomonidan berilgan ko‘rsatmalar natijasida 200 mingdan ortiq iste’molchiga 50 milliard so‘mga yaqin mablag‘ qayta hisob-kitob qilinishi ta’minlangan.
Jumladan, “O‘zsuvta’minot” AJ tomonidan Vazirlar Mahkamasining 2010-yil 28-oktyabrdagi 239-sonli qarori bilan tasdiqlangan nizomda nazarda tutilgan narx shakllantirish talablari buzilgani aniqlandi. Buning natijasida “O‘zsuvta’minot” AJ tomonidan 7 milliard so‘mga yaqin ortiqcha daromad olingani ma’lum bo‘lib, tegishli ko‘rsatma berildi va ijrosi ta’minlandi.
“Hududiy elektr tarmoqlari” AJ korxona va uning hududiy filiallari tomonidan Vazirlar Mahkamasining 2023-yil 29-dekabrdagi 722-sonli qarori bilan tasdiqlangan nizom talablari buzilishi natijasida 5 milliard so‘mga yaqin ortiqcha daromad olingani aniqlanib, iste’molchilar foydasiga qayta hisob-kitob qilish bo‘yicha tegishli ko‘rsatma berildi va ijrosi ta’minlandi.
Raqobat qo‘mitasi bu boradagi tegishli nazorat tadbirlari davom ettirilayotganini bildirdi.
Fevral oyi o‘rtalarida Navoiy viloyatida ichimlik suvi va kanalizatsiya xizmatlari uchun iste’molchilardan 200 million so‘mdan ortiq pul olingani haqida xabar berilgan edi. Bu mablag‘larni qayta hisob-kitob qilish bo‘yicha bajarilishi majburiy bo‘lgan ko‘rsatma berilgan. Namangan viloyatida esa maishiy chiqindi tashish xizmati bo‘yicha iste’molchilarga asossiz hisoblangan 18 milliard so‘mdan ortiq mablag‘larni qayta hisob-kitob qilish bo‘yicha ko‘rsatma berilgandi.
Izoh (0)