O‘zbekistonda joriy yilda gaz va elektr energiyasidan noqonuniy foydalanilishi oqibatida davlat manfaatlariga 98 mlrd so‘m zarar yetkazildi. Bu haqda “O‘zenergoinspeksiya” xabar berdi.
Ma’lum qilinishicha, joriy yilda “O‘zenergoinspeksiya” o‘tkazgan nazorat tadbirlarida 358 ta iste’molchi tomonidan tabiiy gaz va elektr energiyasidan noqonuniy va qoidabuzarlik holatlari aniqlandi. Unga ko‘ra 25,4 mln metr kub tabiiy gaz (62,2 mlrd so‘m) va 29,4 mln kilovatt-soat elektr energiyasidan (35,8 mlrd so‘m) noqonuniy foydalanilishi natijasida davlat manfaatlariga jami 98,1 mlrd so‘m zarar yetkazilgani ma’lum bo‘ldi.
O‘tkazilgan nazorat tadbirlarida miqdori 370,8 tonna qiymati 6,3 mlrd so‘mlik neft mahsulotlaridan belgilangan talablarga zid ravshda foydalanish holatlari aniqlandi. Iste’molchilar tomonidan energiya resurslaridan foydalanish qoidalarini buzish bilan bog‘liq huquqbuzarliklar bo‘yicha 342 ta ma’muriy ish rasmiylashtirildi.
Xususan, o‘tkazilgan nazorat tadbirlarida aniqlangan holatlarning 142 tasi elektr energiyasi, 200 tasi esa tabiiy gazdan foydalanishda qoidabuzarlikka yo‘l qo‘yilgani ma’lum bo‘ldi.
Shuningdek, energetika obyektlarida olib borilayotgan ta’mirlash ishlarida inson hayoti uchun xavf tug‘dirishi mumkin bo‘lgan holatlar yuzasidan 37 ta brigadaning ish faoliyati o‘rganildi. Tashkiliy va texnik tadbirlarni bajarmasdan, xafsizlik texnikasi qoidalari ta’lablariga rioya qilmagan 16 ta brigada ishdan chetlashtirildi.
Inspeksiya tomonidan iste’molchilarga davlat xizmatlarini ko‘rsatish bo‘yicha umumiy quvvati 214 mVt bo‘lgan jami 1 ming 55 ta obyektning elektr ta’minoti loyihalari ekspertizadan o‘tkazildi. Unga ko‘ra, 733 ta iste’molchining elektr qurilmalari elektr tarmoqlariga ulanishiga ruxsat berildi.
Bunday holatlar soni ortib bormoqda
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Gazni o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalanilgan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)