Toshkent shahri va Andijon viloyatida energiya resurslaridan noqonuniy foydalanganlik holatlari aniqlandi. Bu haqda Prokuratura departamenti xabar berdi.
Unga ko‘ra, holatlardan biri Bosh prokuratura huzuridagi departamentning Olmazor tumani bo‘limi tomonidan o‘tkazilgan tergovga qadar tekshiruvlarda aniqlangan. A.A. va J.I. o‘zlariga tegishli noturar bino va yashash xonadonida tijorat maqsadida umumiy foydalanishdagi gaz va elektr tarmoqlariga o‘zboshimchalik bilan ulanib, jami 365,2 mln so‘mlik energiya resurslaridan noqonuniy foydalangan.
Shu kabi departamentning Izboskan tumani va Xonobod shahri bo‘limlari tomonidan o‘tkazilgan tergovga qadar tekshiruvlarda YTTlar A.I. va U.T. noturar bino va dam olish maskanlarida tijorat maqsadida umumiy foydalanishdagi elektr tarmog‘iga o‘zboshimchalik bilan to‘g‘ridan-to‘g‘ri ulanib, jami 688,2 mln so‘mlik elektr energiyasidan noqonuniy foydalanib kelgani aniqlandi.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Bunday holatlar soni ortib bormoqda
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Izoh (0)