O‘zbekistonning ikkita hududida energiya resurslaridan noqonuniy foydalanib kelgan shaxslar aniqlandi. Bu haqda Bosh prokuratura huzuridagi departament xabar berdi.
Navbahor va Baliqchi tumani bo‘limlari tomonidan o‘tkazilgan tergovga qadar tekshiruvlarda fuqarolar M.D. va I.O. o‘z xonadonlarida o‘zboshimchalik bilan gaz tarmog‘iga to‘g‘ridan to‘g‘ri ulangani maʼlum bo‘ldi. Ular 275,1 mln so‘mlik tabiiy gazdan noqonuniy foydalangan.
Shuningdek, Qoraqalpog‘iston Respublikasining Amudaryo tumanida fuqaro F.A. xonadonida o‘zboshimchalik bilan elektr tarmog‘iga ulanib olgan. U 106,4 mln so‘mlik elektr energiyasidan noqonuniy foydalangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Bunday holatlar soni ortib bormoqda
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Izoh (0)