Chili hududining katta qismi 25-fevral elektr ta’minotidan uzildi. Santyago shahri, shuningdek, tog‘-kon sanoati hududlari zarar ko‘rdi. Bu haqda Deutsche Welle xabar berdi.
Chili Ichki ishlar va jamoat xavfsizligi vazirligiga ko‘ra, gap shimoldagi Arika shahridan mamlakat janubidagi Puerto-Mont shahrigacha bo‘lgan hudud haqida ketmoqda. Chilida uy xo‘jaliklarining qariyb 80 foizi elektr ta’minotisiz qolgan. 26-fevralga o‘tar kechasi blekaut tufayli favqulodda holat e’lon qilingan, Santyagoda esa komendantlik soati joriy etilgan.
Santyagoda blekaut fonida ko‘cha chiroqlari o‘chgan va metro ishlamay qolgan. Dunyodagi eng yirik Eskondida mis rudasi konida ham elektr energiyasi uzilgan. O‘z navbatida, Codelco mis rudasi qazib olish davlat konserni barcha konlari blekautdan zarar ko‘rganini ma’lum qilgan.
Chili fuqarolik aviatsiyasi boshqarmasiga ko‘ra, blekaut Arturo Merino xalqaro aeroporti faoliyatiga ta’sir ko‘rsatmagan. Biroq LATAM Airlines aviakompaniyasi ba’zi reyslarga uzilishlar ta’sir qilishi mumkinligini aytgan. Chili ichki ishlar vaziri Karolina Toa kiberhujumni istisno qilgan, uzilish sabablari noma’lum. Aholiga “yaqin soatlarda” elektr ta’minoti tiklanishi aytilmoqda.
Maymun sabab elektr ta’minoti uzildi
Eslatib o‘tamiz, 9-fevral kuni Shri Lankadagi elektr podstansiyasiga kirib qolgan maymun butun mamlakat bo‘ylab elektr ta’minotida uzilishga olib keldi. Maymun ishtirokidagi hodisa Kolombo janubidagi shahar chekkasida sodir bo‘lgan. Energetika vaziri Kumara Jayakodi maymun elektr tarmog‘idagi transformatorga tegib, tizimda muvozanat buzilishiga sabab bo‘lganini aytgan. U nosozliklar uchun aholidan uzr so‘ragan edi
Izoh (0)