Ukraina prezidenti Vladimir Zelenskiy Oq uyda amerikalik hamkasbi Donald Tramp bilan bo‘lgan tortishuvga munosabat bildirdi.
Siyosatchi vitse-prezident Jey Di Vens ham ishtirok etgan tortishuvdan afsusdaligini ma’lum qildi.
Afsuski, shunday bo‘ldi. Hammasini to‘g‘rilash vaqti keldi. Kelgusidagi hamkorlik va muloqot konstruktiv bo‘lishini istardik. Foydali qazilmalar va xavfsizlik bo‘yicha kelishuvga kelsak, Ukraina uni istalgan vaqtda va har qanday qulay formatda imzolashga tayyor. Biz bu kelishuvni ko‘proq xavfsizlik va ishonchli xavfsizlik kafolatlari sari qadam deb bilamiz va u samarali ishlashiga chin dildan umid qilaman, dedi Zelenskiy.
Shuningdek, Ukraina rahbari o‘z mamlakatining tinchlikka sodiqligini tasdiqladi.
Hech birimiz oxiri yo‘q urushni xohlamaymiz. Ukraina mustahkam tinchlikni yaqinlashtirish uchun imkon qadar tezroq muzokaralar stoliga o‘tirishga tayyor. Hech kim tinchlikni ukrainaliklardan ko‘ra ko‘proq xohlamaydi. Mening jamoam va prezident Trampning kuchli rahbarligi ostida barqaror tinchlikka erishish uchun ishlashga tayyormiz, dedi Ukraina prezidenti.
Uning so‘zlariga ko‘ra, mojaroning tugashi uchun birinchi bosqich garovdagilarni ozod qilish va havo hududida tinchlik o‘rnatish bo‘lishi mumkin. Bu raketalar, dronlar, energetika inshootlari va boshqa fuqarolik infratuzilmasiga bomba tashlashni taqiqlashni, shuningdek, dengizda darhol sulh tuzishni o‘z ichiga oladi.
Izoh (0)