AQSH prezidenti Donald Tramp muzokaralardagi janjaldan so‘ng Ukraina prezidenti Vladimir Zelenskiyning tushligini yeyishga qaror qildi. Bu haqda prezident matbuot kotibi Karolin Levitt Fox News telekanaliga bergan intervyusida ma’lum qildi.
Xabarga ko‘ra, Tramp ukrainalik hamkasbi “tinchlik o‘rnatish bo‘yicha jiddiy muhokamaga tayyor emas” degan xulosaga kelgani uchun birgalikdagi tushlikni bekor qilgan.
Prezidentga tushlik yoqdi, u to‘g‘ridan-to‘g‘ri va ko‘chma ma’noda Zelenskiyning tushligini yedi, dedi Levitt.
Zelenskiy boshchiligidagi Ukraina delegatsiyasi ishtirok etishi kerak bo‘lgan tushlik menyusi suratini Oq uy apparati rahbari o‘rinbosari Den Skavino e’lon qildi. Ro‘yxatda pomidor, karam va sarsabil qo‘shilgan yashil salat mavjud. Asosiy taom sifatida menyuga rozmarin bilan pishirilgan tovuq kiritilgan. Shirinlik uchun krem-bryule, rezavor mevalar assortimenti va sitrusli pechenye taklif qilingan.
Donald Tramp bu taomlarni Zelenskiy va uning delegatsiyasiz, o‘z jamoasi davrasida tanovul qilgan.
Prezidentlar o‘rtasidagi tortishuv
28-fevral kuni Oval kabinetdagi muzokaralarda Zelenskiy Ukraina uchun xavfsizlik kafolatlari zarurligi va uni muzokaralar jarayoniga qo‘shish kerakligi haqida gapirdi. U Kiyev hech qachon shunchaki o‘t ochishni to‘xtatishga rozi bo‘lmasligi, chunki Rossiya avvalgi kelishuvlarni buzganini ta’kidladi. Siyosatchi resurslar bo‘yicha kelishuv Ukraina xavfsizligini ta’minlash uchun yetarli emasligini bildirdi.
Tramp shunda Ukraina prezidentini o‘z mamlakatiga hurmatsizlikda aybladi, bu yo‘l bilan “ishni olib borish juda qiyin bo‘lishini” aytdi. U Zelenskiy vaziyatga mas’uliyatsiz yondashayotganini bildirdi. Tramp uning xatti-harakatlari millionlab odamlar hayotini xavf ostiga qo‘yishini aytdi.
Uchrashuv Tramp Zelenskiyni “Uchinchi jahon urushini boshlash bilan o‘ynashayotganlikda” ayblashi va “Bu televideniye uchun ajoyib shou bo‘ladi” degan so‘zlari bilan yakunlandi.
Izoh (0)