Ukraina prezidenti Vladimir Zelenskiy 2-mart kuni AQSH prezidenti Donald Tramp bilan munosabatlarini saqlab qolishi mumkinligini, biroq muzokaralarni yopiq eshiklar ortida davom ettirish kerakligini aytdi. Bu haqda Reuters xabar berdi.
Zelenskiy 2-mart kuni Londonda Yevropa yetakchilari bilan bo‘lib o‘tgan sammitdan so‘ng jurnalistlar bilan suhbatlashdi. Uning fikricha, AQSH Ukrainaga yordam berishni to‘xtatmaydi, chunki “sivilizatsiyalashgan dunyo yetakchilari” sifatida ular Rossiya prezidenti Vladimir Putinga yordam berishni istamaydi.
Ammo Zelenskiy yuzaga kelishi mumkin bo‘lgan har qanday qiyinchiliklarga tayyorligini aytdi.
Munosabatlarni saqlash masalasiga kelsak, fikrimcha, aloqalarimiz davom etadi. Bunday muhokamalar to‘liq ochiq bo‘lishi to‘g‘ri emas deb o‘ylayman. Yuz bergan voqealarning formati bizga hamkorlar sifatida ijobiy yoki qo‘shimcha hech narsa keltirmadi deb hisoblayman, dedi Zelenskiy.
Ukraina prezidenti AQSH bilan foydali qazilmalarni yetkazib berish bo‘yicha taklif etilgan bitimni imzolashga hamon tayyor ekanini va uning fikricha, AQSh ham bunga tayyor bo‘lishini qo‘shimcha qildi.
O‘z iste’fosi haqidagi savolga javob berar ekan, Zelenskiy “meni NATOga almashtirish mumkin. Men NATOga a’zolik uchun lavozimimdan ketishga roziman, demak, vazifamni bajardim”, dedi.
Shu bilan birga, Ukraina prezidenti uni almashtirish oson bo‘lmasligini ta’kidladi.
Shunchaki saylov o‘tkazishning o‘zi yetarli emas. Meni ishtirok etishdan chetlatish kerak bo‘lardi. Bu biroz murakkab. Chunki men bilan ham kelishib olish kerak, dedi siyosatchi.
Yevropa ittifoqining Londondagi favqulodda sammitida Yevropa yetakchilari Zelenskiy va Ukrainani to‘liq qo‘llab-quvvatlashlarini bildirdi.
Prezidentlar o‘rtasidagi tortishuv
28-fevral kuni Oval kabinetdagi muzokaralarda Zelenskiy Ukraina uchun xavfsizlik kafolatlari zarurligi va uni muzokaralar jarayoniga qo‘shish kerakligi haqida gapirdi. U Kiyev hech qachon shunchaki o‘t ochishni to‘xtatishga rozi bo‘lmasligi, chunki Rossiya avvalgi kelishuvlarni buzganini ta’kidladi. Siyosatchi resurslar bo‘yicha kelishuv Ukraina xavfsizligini ta’minlash uchun yetarli emasligini bildirdi.
Tramp shunda Ukraina prezidentini o‘z mamlakatiga hurmatsizlikda aybladi, bu yo‘l bilan “ishni olib borish juda qiyin bo‘lishini” aytdi. U Zelenskiy vaziyatga mas’uliyatsiz yondashayotganini bildirdi. Tramp uning xatti-harakatlari millionlab odamlar hayotini xavf ostiga qo‘yishini aytdi.
Uchrashuv Tramp Zelenskiyni “Uchinchi jahon urushini boshlash bilan o‘ynashayotganlikda” ayblashi va “Bu televideniye uchun ajoyib shou bo‘ladi” degan so‘zlari bilan yakunlandi.
Izoh (0)