Исроил энергетика вазири Эли Коэн 9 март куни Ғазо секторига электр энергияси етказиб беришни зудлик билан тўхтатишни буюрди. Бу ҳақда The Times of Israel хабар берди.
“Мен ҳозиргина Ғазо секторига электр энергияси етказиб беришни зудлик билан тўхтатиш тўғрисидаги буйруқни имзоладим. Биз барча гаровга олинганларни озод қилиш ва ҲАМАС Ғазода қолмаслигини таъминлаш учун ихтиёримиздаги барча воситаларни ишга соламиз”, деди Коэн видеомурожаатида.
Ўтган ҳафта Исроил Ғазога инсонпарварлик ёрдами олиб киришни бутунлай тақиқлади. Исроил томонига кўра, бунга асирларни алмашиш бўйича келишувнинг биринчи босқичи якунлангани ва ҲАМАС АҚШ президентининг махсус вакили Стив Уиткоффнинг музокараларни давом эттириш бўйича таклифларини қабул қилишдан бош тортгани сабаб бўлган. Ғазога ҳар қандай товарларни етказиб бериш 2 март куни эрталабдан тўхтатилган.
Фаластиннинг ҲАМАС ҳаракати Исроилнинг қарорини кескин қоралаб, буни ҳарбий жиноят ва “ўт очишни тўхтатиш бўйича келишувга жиддий зарба” деб атаган.
Аввалроқ Исроил электр таъминотини узиши ҳақида The Guardian нашри хабар берган эди. Нашр тилга олган “жаҳаннам режаси” Ғазодаги қамални янада кучайтиришни назарда тутади. Ҳозирча олти ҳафталик вақтинчалик тинчлик келишуви кучда қолаётган бўлса-да, унинг кейинги босқичи ҳақида музокаралар олиб борилмаяпти. Шу сабабли Исроил ва ҲАМАС яна урушга қайтиш эҳтимолига тайёргарлик кўрмоқда.
Исроил Ғазога озиқ-овқат ва ёнилғи ортилган гуманитар ёрдамни тўхтатишдан ташқари секторнинг 2,2 миллион аҳолисини аста-секин тўлиқ изоляция қилишга тайёргарлик кўрмоқда. Ҳукумат бу чоралар дастурини “жаҳаннам режаси” деб атаган.
Изоҳ (0)