Argentinada “Vatan uchun ittifoq” partiyasi prezident Xavyer Mileyga nisbatan impichment jarayonini boshlashni talab qilmoqda. Bu haqda Sinembargo xabar berdi.
Muxolifatchilarning bu qaroriga Miley X (sobiq Twitter) ijtimoiy tarmog‘idagi sahifasida kriptovalyuta haqidagi postni e’lon qilgani sabab bo‘ldi.
“Mileyning kriptovalyuta bilan bog‘liq firibgarlik jinoyatida ishtiroki g‘oyat jiddiy masala. Bu misli ko‘rilmagan janjal. Deputatlar bloki prezidentga nisbatan impichment taklifini kiritishga qaror qildi”, deyiladi partiya bayonotida.
14-fevral kuni Miley X tarmog‘ida “Argentina iqtisodiyoti o‘sishini rag‘batlantirishga yordam beradigan” LIBRA kriptovalyutasi haqidagi ma’lumotni e’lon qilgandi. Mahalliy treyderlar bu tangani xarid qila boshlagan, natijada uning bozor qiymati 6 milliard dollargacha ko‘tarilgan, biroq keyin valyuta qiymati 94 foizga qulagan.
Keyinchalik prezident o‘z postini o‘chirib tashlagan va “loyihaning tafsilotlarini bilmagani uchun uni boshqa qo‘llab-quvvatlamaslikka qaror qilganini” aytgan. Foydalanuvchilar uni “firibgar” deb atagan, investorlar esa o‘nlab million dollar yo‘qotgan.
Izoh (0)