Argentina prezidenti Xavyer Miley davlat rahbari va hukumat aʼzolarining maoshlari oshirilishi bilan bog‘liq janjaldan so‘ng inson kapitali bo‘yicha vazir o‘rinbosarini ishdan bo‘shatganini maʼlum qildi, deb yozadi TASS.
Men mehnat vaziri o‘rinbosarini ishdan bo‘shatdim. Hozir u bu haqda xabardor qilinmoqda. Men uni yo‘l qo‘yish mumkin bo‘lmagan xatosi uchun ishdan bo‘shatdim, — dedi Miley LN+ telekanalida.
Davlat rahbarining so‘zlariga ko‘ra, u allaqachon ish haqini oshirishni bekor qilish haqidagi farmonni imzolagan.
“Oshiqcha to‘langan pullar keyingi oy ularning maoshlaridan ushlab qolinadi”, — dedi Miley.
9-mart kuni muxolifatchi deputat Viktoriya Tolosa Paz ijtimoiy tarmoqda yanvar-fevral oylarida prezident va hukumat vazirlarining maoshlari 48 foizga oshgani haqida xabar berdi. Qonun chiqaruvchining so‘zlariga ko‘ra, davlat rahbari oyiga 6 million peso (6,7 ming dollar) ola boshlagan.
Shundan so‘ng Miley bu haqida bilmasligini va maosh oshirilishi haqidagi vazir qarorini bekor qilishini yozdi.
Izoh (0)