Italiya bosh vaziri Jorja Meloni norasmiy uchrashuv uchun AQSHning yangi saylangan prezidenti Donald Trampning Floridadagi Mar-a-Lagodagi qarorgohiga keldi. Bu haqda Reuters xabar berdi.
Xabarga ko‘ra, Yevropaning asosiy yetakchisi hisoblangan Meloni 20-yanvar kungi inauguratsiyasi oldidan Tramp bilan aloqalarni mustahkamlamoqchi. Ularning uchrashuvi tafsilotlari oshkor etilmagan.
Italiya ommaviy axborot vositalariga ko‘ra, Meloni Tramp bilan Rossiyaning Ukrainadagi urushi, savdo masalalari, Yaqin Sharq, shuningdek, Tehronda italiyalik jurnalist Sesilya Salaning hibsga olinishi haqida muloqot qilgan bo‘lishi mumkin.
Italiya bosh vaziri tashrifi AQSHning amaldagi prezidenti Jo Baydenning 9—12-yanvar kunlari rejalashtirilgan Rimga tashrifidan bir necha kun oldin bo‘lib o‘tdi. Meloni 5-noyabr kuni bo‘lib o‘tgan saylovlardan keyin Florida shtatida Trampni ziyorat qilgan kam sonli xorijiy yetakchilardan bo‘ldi.
Avvalroq AQShning saylangan prezidenti Argentina prezidenti Xavyer Miley va Kanada bosh vaziri Jastin Tryudo bilan uchrashgandi. Dekabr oyi boshida esa Vengriya bosh vaziri Viktor Orban ham Donald Trampnikiga “tinchlik missiyasi” bilan tashrif buyurgan.
Izoh (0)