Argentina hukumati byudjet xarajatlarini qisqartirish bo‘yicha sa’y-harakatlar doirasida prezident samolyotlari va vertolyotlarini qurolli kuchlarga topshirdi. Bu haqda La Nacion nashri xabar bermoqda.
Nashr manbalariga ko‘ra, uchta samolyot va uchta vertolyot prezident ma’muriyatiga tegishli bo‘lib qoladi, ammo harbiylar ulardan foydalanishi mumkin. Kelgusida hukumat 2022-yilda sotib olingan Boeing 757 va 1993-yilda sotib olingan Boeing 737 samolyotlarini sotishni rejalashtirmoqda.
Gazetaning qayd etishicha, rasmiylar tushgan mablag‘ning bir qismi texnik xizmat ko‘rsatish arzonroq bo‘ladigan kichikroq samolyot sotib olishga yo‘naltirilishini istisno etmaydi. Learjet 60 T-11 samolyoti hukumat balansida qoladi.
Argentina prezidenti Xavyer Miley 1-mart kuni parlament sessiyasining ochilishida so‘zga chiqib, rasmiylar yaqin orada mansabdor shaxslar va ularning oila a’zolariga shaxsiy samolyotlardan foydalanishni taqiqlovchi qoidalarni qabul qilishini aytdi. Davlat rahbarining o‘zi ham hukumat aʼzolari bilan muntazam reyslarda xizmat safarlariga borishini bir necha bor taʼkidlagan.
Izoh (0)