Sud Nikaragua prezidenti Daniel Ortega va uning rafiqasi, respublika vitse-prezidenti Rosario Murilloni qidiruvga berish to‘g‘risida qaror qabul qildi. Bu haqda inson huquqlari buzilishi ehtimoli bo‘yicha Nikaragua hukumatiga nisbatan tergov o‘tkazilishiga erishgan argentinalik advokat Dario Richarte ma’lum qildi.
“Qariyb ikki yarim yillik tergovdan keyin sudya hozirgina Daniel Ortega va Rosario Murillo, shuningdek, o‘nga yaqin boshqa shaxslarni so‘roqqa chaqirish va xalqaro qidiruvga berish so‘rovi bilan hibsga olish orderini berdi”, deb yozgan Richarte o‘zining X ijtimoiy tarmog‘idagi sahifasida.
Nikaragua La Prensa nashrining aniqlik kiritishicha, bu Nikaraguadagi 2018-yildagi tartibsizliklar bilan bog‘liq. Bu harakatlarga soliqlarni oshirish va ijtimoiy nafaqalarni qisqartirishni ko‘zda tutgan ijtimoiy ta’minot islohoti sabab bo‘lgandi. Namoyishlar fonida Orgeta islohotni bekor qilgan, ammo mitinglar davom etgan — namoyishchilar uning iste’fosini talab qilgan.
Inson huquqlari bo‘yicha Nikaragua nodavlat assotsiatsiyasi (ANPDH) ma’lumotlariga ko‘ra, mamlakatdagi namoyishlar chog‘ida bir necha yuz kishi halok bo‘lgan.
Argentina sudiga ko‘ra, inson huquqlarini buzganlik borasidagi ayblov — har qanday milliy yurisdiksiyadan tashqarida. Shuning uchun boshqa davlat rahbarini so‘roqqa chaqirish va uni hibsga olish uchun order berish huquqiga ega.
Argentina sudi 2024-yil sentyabrida insoniyatga qarshi jinoyatlari uchun Venesuela rahbariyatining bir qator a’zolarini, jumladan, mamlakat prezidenti Nikolas Maduroni ham hibsga olishga order bergandi.
Izoh (0)