Dunyoning eng boy odami Ilon Mask prezident Donald Trampning 20-yanvar kuni bo‘lib o‘tadigan ikkinchi inauguratsiyasiga taklif etilgan bir nechta milliarderlar qatorida bo‘ladi. Forbes ma’lumotlariga ko‘ra, Tesla rahbari Trampning qayta saylanishida muhim rol o‘ynagan va uning saylov kampaniyasiga chorak milliard dollardan ortiq mablag‘ sarflagan.
Xabar qilinishicha, Mask Tramp ma’muriyatida tashkil etiladigan hukumat faoliyati samaradorligini oshirish bo‘yicha yangi departamentga rahbarlik qiladi. Biotexnologiyalar sohasidagi tadbirkor Vivek Ramasvami esa departamentning boshqa hammuassisi bo‘ladi.
Trampning inauguratsiyasida Amazon rahbari Jeff Bezos va Meta rahbari Mark Sukerberg ham ishtirok etishi kutilmoqda.
Xorijiy rahbarlar AQSH prezidentlarining inauguratsiya marosimlariga kamdan-kam taklif etilsa-da, Tramp bir nechta istisnolar qildi. Bloomberg ma’lumotlariga ko‘ra, marosimda Argentina prezidenti Xaver Miley ishtirok etadi. U noyabr oyidagi saylovlardan so‘ng Tramp bilan uchrashgan birinchi xorijiy rahbar bo‘ldi.
Shuningdek, XXR raisi Si Szinpin ham taklif etilgan bo‘lib, u marosimga o‘z vakilini yuboradi. Bundan tashqari, Italiyaning o‘ta o‘ng qanot bosh vaziri Jorja Meloni ham taklif qilingan, biroq u ish jadvalining zichligi tufayli Vashingtonga tashrif buyura olishiga ishonchi komil emasligini ma’lum qildi.
An’anaga ko‘ra, inauguratsiyada AQSHning barcha hayot prezidentlari ishtirok etadi. Lavozimni topshirayotgan prezident Jo Bayden va birinchi xonim Jill Baydenlar ham marosimda qatnashadi. To‘rt yil avval Tramp saylovda g‘alaba qozonganini da’vo qilib, Baydenning inauguratsiyasida ishtirok etishdan bosh tortgan edi.
Inauguratsiya marosimiga Qo‘shma Shtatlarning sobiq prezidentlari Barak Obama, kichik Jorj Bush va Bill Klinton ham tashrif buyuradi. Bush va Klinton tadbirga turmush o‘rtoqlari — Lora Bush va sobiq davlat kotibi Xillari Klinton bilan birga kelishadi.
Biroq sobiq birinchi xonim Mishel Obama marosimda ishtirok etmaydi, bu haqda Obama oilasi idorasi xabar berdi. Bu so‘nggi haftalarda u muhim tadbirni o‘tkazib yuborayotgan ikkinchi holat: Mishel Obama sobiq prezident Jimmi Karterning dafn marosimida ham qatnashmagan edi, o‘shanda mamlakatning boshqa sobiq rahbarlari va ularning rafiqalari to‘plangan edilar.
Vitse-prezident Kamala Harris va uning turmush o‘rtog‘i Duglas Emxoff ham inauguratsiyada ishtirok etishi kutilmoqda.
Izoh (0)