Argentina Milliy Kongressi binosi oldida 12-iyun kuni hukumat siyosatiga qarshi fuqarolar va politsiya o‘rtasida to‘qnashuv yuzaga keldi. Bu haqda CNN nashri xabar berdi.
Maʼlumotlarga ko‘ra, Kongress binosida chorshanba kuni prezident islohotlari borasida muhokama o‘tkazish uchun deputatlar yig‘ilishi kerak bo‘lgan. Ammo hududga g‘azablangan olomon oqib kelishi oqibatida hukumat yig‘ini to‘xtatilgan.
Oldinroq o‘ta liberal qarashlari bilan tanilgan Argentina prezidenti Xavyer Miley hukumat o‘zgarishi va iqtisodiy islohotlar to‘g‘risidagi qonun loyihasini taklif qilgan edi. Bu islohotlarga ko‘ra ijtimoiy xarajatlar kamaytirilishi esa turli guruhlar va kasaba uyushmalarining faol noroziligini keltirib chiqargan.
Politsiya Argentina Kongressi oldida olomonni tarqatish uchun suv purkagichlar va ko‘zdan yosh oqizuvchi gazdan foydalangan. Namoyishchilar og‘ir jismlar va buyumlar uloqtirib, politsiyaga qarshilik qilgan.
Namoyishchilar bilan to‘qnashuvda mahalliy telekanalga tegishli avtomobil yoqib yuborilgan. Hodisa oqibatida shikastlangan fuqarolar haqida maʼlumot mavjud emas.
Deputatlar palatasida allaqachon maʼqullangan prezident qonun loyihasi maʼmuriy, iqtisodiy, moliyaviy va energetika masalalari bo‘yicha bir yil muddatga mamlakatda favqulodda holat eʼlon qilishni o‘z ichiga oladi. Bu esa ushbu sohalarda qonun chiqaruvchi organ vakolatlarini Kongress bilan hisoblashmasdan turib, ijroiya hokimiyatiga topshirish imkonini beradi.
Izoh (0)