Argentina prezidenti Xavyer Miley Argentina terma jamoasi sardori Lionel Messini Fransiya terma jamoasiga qaratilgan irqchilikka qarshi qo‘shiqlar uchun kechirim so‘rashga chaqirgan Argentina sport vaziri o‘rinbosari Xulio Garroni ishdan bo‘shatdi.
“Prezident devoni ma’lum qiladiki, hech bir hukumat a’zosi Argentina terma jamoasi, jahon chempioni va ikki karra Amerika chempioni yoki boshqa har qanday fuqaroga nimani izohlash, nimani o‘ylash yoki nima qilish kerakligini o‘rgatishga haqi yo‘q. Shu sababdan Xulio Garro Argentina sport vaziri o‘rinbosari lavozimidan ketadi”, deyiladi X ijtimoiy tarmog‘idagi (sobiq Twitter) rasmiy bayonotda.
Haqoratomuz qo‘shiq Argentina terma jamoasi futbolchilari tomonidan Kolumbiya bilan 2024-yilgi Amerika Kubogi finalida (1:0) g‘alaba qozonganidan so‘ng ijro etildi. Argentinalik futbolchi Enzo Fernandes kubokni qo‘lga kiritganini nishonlar ekan, ijtimoiy tarmoqda jonli efirni boshladi va uning jamoadoshlari: “Ular Fransiya terma jamoasida o‘ynaydi, lekin barchasi Angoladan” deb irqiy kamsituvchi qo‘shiqni kuyladi.
Izoh (0)