Joriy yilning 20-yanvar kuni qasamyod qabul qilgandan so‘ng, Donald Tramp yuqori martabali shaxslar bilan birga inauguratsiya ziyofatida ishtirok etadi. Bu Qo‘shma Shtatlarda yarim asrdan ortiq vaqtdan beri o‘tkazib kelinayotgan tantanali va majburiy tadbir hisoblanadi.
Inauguratsiya ziyofatida mehmonlarga quyidagi taomlar tortiladi:
- Pomidor tartar, lavr bargi qayla, marinadlangan sabzavotlar, romanesko, shivit va piyoz moyi bilan tayyorlangan Chesapik qisqichbaqa pirogi.
Ikkinchi taom sifatida:
- “Dyuymovochka” sabzili katta Omaxa Angus Ribay steyki, “Rabe” brokkoli, ko‘katli qayla, qizil vino va trufel qo‘shilgan maxsus qayla hamda kartoshkali graten.
Kongressning Inauguratsiya marosimlari bo‘yicha Qo‘shma qo‘mitasi matbuot bayonotiga ko‘ra, mehmonlar tushlikni Minnesota olmali muzli terrin desserti bilan yakunlashlari kerak. Dessert smetanali muzqaymoq va tuzli karamel bilan birga tortiladi.
Har bir taomga alohida vino taqdim etiladi. Biri Virjiniya shtatining Montichello shahridan, ikkinchisi esa Kaliforniyadan keltiriladi.
Trampning inauguratsiyasi haqida nimalar ma’lum
2025-yil 20-yanvarda Tramp rasman AQSH prezidenti lavozimiga kirishib, 47-davlat rahbari bo‘ladi. Ushbu inauguratsiya uning birinchi prezidentlik muddatidan (2017-2021) keyin Oq uyga qaytishini nishonlaydi.
Tramp 78 yoshida AQSH tarixidagi eng keksa prezident bo‘ladi.
Vashingtondagi odatdan tashqari past harorat tufayli inauguratsiya marosimi an’anaviy ochiq havoda o‘tkaziladigan joydan Kapitoliydagi rotondaga ko‘chirildi. Asosiy tadbirlar Toshkent vaqti bilan soat 21:00 da boshlanadi.
Marosimda AQSHning sobiq prezidentlari: Bill Klinton, Jorj Bush, Barak Obama va Jo Bayden ishtirok etadi. Xalqaro mehmonlar orasida Italiya bosh vaziri Jorja Meloni va Argentina prezidenti Xavyer Miley bor. Xitoy nomidan vitse-prezident Xan Chjen qatnashadi. Shuningdek, taklif etilganlar ro‘yxatidan Ilon Mask, Mark Sukerberg, Jeff Bezos va Shou Szi Chu kabi mashhur tadbirkorlar ham joy olgan.
Tadbirning musiqiy qismini Kristofer Machchio, Kerri Andervud va Li Grinvud, shuningdek, Village People guruhi o‘z chiqishlari bilan olib boradi.
Tramp o‘z lavozimining birinchi kunida Jo Baydenning avvalgi ma’muriyati siyosatini bekor qilishga qaratilgan 100 dan ortiq ijroiya farmonlarini imzolashi kutilmoqda. Ushbu chora-tadbirlar immigratsiya, savdo, iqtisodiyot va iqlim o‘zgarishi sohalarini qamrab oladi.
Izoh (0)