2024-yil san’at olamida bir qator mashhur san’atkorlar yangi hayot bosqichiga qadam qo‘ydi — farzandli bo‘lishdi. Farzandli bo‘lish ko‘plab san’atkorlar uchun yangi mas’uliyat va ijod qilish uchun yangi ilhom manbayi bo‘ldi. 2024-yilda ota-ona bo‘lgan san’atkorlar va ularning yangi avlod vakillari haqida eslab o‘tamiz.
Yulduz Turdiyeva
39 yoshli xonanda Yulduz Turdiyeva 12-yanvarda uchinchi bor onalik baxtiga sazovor bo‘ldi. Uning oilasida qiz farzand dunyoga keldi.
Jasur Umirov
Xonanda jasur Umirov 21-aprel kuni o‘g‘il farzandli bo‘ldi. Bu haqda uning do‘stlari Instagram’da ma’lum qildi. Jasur Umirov o‘g‘liga Muhammad deb ism qo‘ydi va unga atab qo‘shiq ham kuyladi. Bu xonandaning ilk bor otalik maqomiga erishishi.
Xonanda Mohlaroyim
Baby Mohi taxallusi bilan ijod qiladigan xonanda, instabloger Mohlaroyim ilk bor ona bo‘ldi — u qiz farzandni dunyoga keltirdi.
Jamila G‘ofurova
Taniqli aktrisa Jamila G‘ofurova to‘rtinchi marotaba ona bo‘ldi. U 2-may kuni o‘g‘il farzandni dunyoga keltirdi, jajji chaqaloqqa Abubakr deya ism qo‘ydi.
Xonanda Malika Egamberdiyeva
Iste’dodli xonanda Malika Egamberdiyeva 8-may kuni ikkinchi marta ona bo‘ldi. U yana bir qiz farzandni dunyoga keltirdi, jajji chaqaloqqa ota-onasi Xadichabonu deya ism qo‘yishdi.
Aktrisa Zebuniso Xoliqova
Taniqli aktrisa Muqaddas Xoliqovaning qizi aktrisa Zebuniso Xoliqova ham 15-may kuni qiz farzandli bo‘ldi. U qiziga Mumtozbegim deya ism qo‘ydi. Bu haqda aktrisaning o‘zi Instagram’da ma’lum qilgandi.
Yorqinxo‘ja Umarov va Zinnura
Xonanda Yorqinxo‘ja Umarov 15-iyun kuni ilk bor ota bo‘ldi. Ozodbek Nazarbekovning qizi Zinnura o‘g‘il farzandni dunyoga keltirdi. Jajji chaqaloqqa Abdul-Azizxo‘ja deb ism qo‘yishdi.
Oybek va Nigora
Yulduzli juftlik Oybek va Nigora xonadonida to‘rtinchi farzand dunyoga keldi. Nigora iyul oyida ikkinchi qizaloqning onasi bo‘ldi va unga Aylin deb ism qo‘yishdi. Endi Oybek va Nigoraning oilasida ikki o‘g‘il va ikki qiz farzand bor.
Zohid Rizqiyev va Kamola Ortiqova
“Ummon” guruhining sobiq a’zosi Zohid Rizqiyev shu yilning 16-avgustida ikkinchi marotaba ota bo‘ldi. Uning rafiqasi Kamola Ortiqova qiz farzandni dunyoga keltirdi, juftlik qizaloqqa Sayha deb ism qo‘ydi.
Aktrisa Dilshoda Rustamjonova
Aktrisa, instabloger Dilshoda Rustamjonova avgust oyida ilk bor ona bo‘ldi. U qiz farzandni dunyoga keltirdi va jajji chaqaloqqa ota-onasi Bibisora deb ism qo‘yishdi.
Aktrisa Xonzoda Do‘stova
Taniqli instabloger va aktrisa Xonzoda Do‘stova ham shu yil ilk bor ona bo‘ldi. U o‘g‘il farzandni dunyoga keltirdi va chaqaloqqa Yusuf deya ism qo‘ydi.
Munisa Rizayeva
Xonanda Munisa Rizayeva 24-noyabr kuni ilk marta ona bo‘ldi. U Argentinaning Buenos Ayres shahrida joylashgan klinikalardan birida o‘g‘il farzandni dunyoga keltirdi.
Xonanda farzandini kesarcha kesish yo‘li bilan dunyoga keltirishni rejalashtirayotgani haqida aytib o‘tgandi. Munisa Argentina tibbiyotining rivojlangani bo‘yicha dunyoda 33-o‘rinda turishi sababli farzandini aynan Buenos Ayresda dunyoga keltirishini aytgan. Hozirda u Argentinada turmush o‘rtog‘i va o‘z onasi bilan yashamoqda va O‘zbekistonga 2025-yilning martida qaytishni rejalashtiryapti.
Bir necha kundan oldin xonanda Instagram’da muxlislarini o‘g‘lini ko‘rsatdi va unga atab qo‘shiq kuyladi.
Aktyor Farhod Mahmudov
“Baron” filmi yulduzi Farhod Mahmudov 52 yoshida ikkinchi bor ota bo‘ldi. U rafiqasi va qizalog‘i bilan tushgan suratini sahifasiga joylagan. Aktyorning birinchi turmushidan Iskandar ismli o‘g‘li bor.
Rejissyor Ahad Qayum
Rejissyor, shoir va aktyor Ahad Qayum ham bu yil uchinchi marta ota bo‘ldi. U chaqaloqni tug‘uruqxonadan olib chiqish jarayonlari aks etgan videoni sahifasiga joyladi.
Qiziqchi Valijon Shamshiyev
So‘z ustasi Valijon Shamshiyev o‘z sahifasiga 11-farzandi bilan tushgan videosini joyladi. Qiziqchi ayni paytda 8 qiz va 3 o‘g‘ilning otasi.
Qo‘shiqchi Mahliyo Omon
Yosh xonanda Mahliyo Omon ham bu yil ilk bora onalik baxtiga muyassar bo‘ldi. U o‘g‘il farzand dunyoga keltirdi va chaqaloqqa Muhammadali deya ism qo‘ydi.
Bundan tashqari vayner Dili.me va “Havas” guruhi xonandasi Shahnoza ham shu yil ota-onalik baxtiga erishdi. Farzandli bo‘lgan barcha-barchani tabriklaymiz va jajji go‘daklarni el-yurt ravnaqiga hissa qo‘shadigan insonlar bo‘lishiga tilakdoshmiz!
Izoh (0)