AQSHning Nebraska shtatidagi veterinariya klinikasiga katta shokoladli tortni yeb qo‘ygan opossum olib kelindi. Veterinarlar ko‘rsatgan yordam natijasida mitti hayvonning hayoti saqlab qolindi.
Nebraskalik Kim Dogget ismli ayol uyining terassasida xaltali sutemizuvchi — opossumni ko‘rib qolgan. Uning aytishicha, muzlatkichda yetarli joy yo‘qligi sababli tortni hovlidagi stol ustiga qo‘yib ketgan. Biroz vaqt o‘tib tashqariga qaytib chiqqanida esa tortning deyarli hammasini yeb qo‘ygan opossumni uchratgan.
Avvaliga Dogget va uning oilasi hayvonni terassadan haydab chiqarishga harakat qilishdi, ammo uning o‘rnidan siljishga kuchi qolmaganini va og‘ir nafas olayotganini ko‘rgach, ularning hayvonga rahmi keldi.
So‘ng ayol hayvonlar uchun shokolad xavfli yoki xavfli emasligini aniqlash uchun internetdan ma’lumot izlab ko‘rdi, ammo bu mavzuda hech qanday maqola topa olmadi. Doggett shirinliklar it va mushuk kabi hayvonlar uchun mos emasligini yaxshi bilar edi, shuning uchun u opossumga yordam berishga qaror qildi.
Hayvonlarni nazorat qilish xodimi opossumni Wildlife Rehab klinikasiga olib ketdi. Shokoladdan yuzaga kelishi mumkin bo‘lgan zaharlanishning oldini olish uchun hayvonga faollashtirilgan ko‘mir berildi va tibbiy ko‘rikdan to‘liq o‘tkazildi. Xususan, undan qon tahlillari olindi va rentgen apparatida tekshirildi.
-1W-0icP8.webp)
Tahlillar natijasida hayvonda yana bir jiddiy muammo aniqlandi: opossum qonida qo‘rg‘oshin miqdori ko‘payib ketgan. Ehtimol, bunday zaharlanish uning hasharotlar bilan oziqlangani sabab bo‘lgan.
Opossum hozirda davolanmoqda. U reabilitatsiya kursidan o‘tishi kerak. Mart oyining oxirida u tabiatga qo‘yib yuboriladi.
Izoh (0)