Isroilning uch nafar vaziri HAMAS bilan erishilgan kelishuvga norozilik sifatida iste’foga chiqdi. Bu haqda The Times of Israel xabar berdi.
Milliy xavfsizlik vaziri Itamar Ben-Gvir o‘t ochishni to‘xtatish bitimi tuzilgandan so‘ng iste’foga chiqqanini aytdi. U rahbarlik qilayotgan o‘ta o‘ng qanot “Otzma Yexudit” partiyasi tegishli bayonot berdi.
Ben-Gvir Isroil bosh vaziri Binyamin Netanyaxuni “barcha mafkuraviy qizil chiziqlarni kesib o‘tganlikda” aybladi. Vazir HAMAS bilan kelishuvni “terrorizmning to‘liq g‘alabasi” deb atadi.
Shuningdek, Ben-Gvirning hamkasblari — meros vaziri Amixay Eliyagu va milliy barqarorlik bo‘yicha vazir Isxak Vasserlauf iste’foga chiqdi.
“Otzma Yexudit” hukmron koalitsiyadan chiqqanini e’lon qildi. Partiya agar Isroilning HAMASga qarshi harbiy harakatlari qayta tiklansa va to‘liq g‘alaba qozonilgunga qadar davom etsa, ortga qaytishga tayyorligini bildirdi.
Bitimni hukumatning yana bir a’zosi — moliya vaziri va “Diniy sionizm” partiyasi yetakchisi Betsalel Smotrich tanqid qildi. Netanyaxu ikkala vazir bilan ham uchrashdi. Shundan keyin Smotrich hukumat tarkibidan chiqmaslikka va’da berdi.
“Otzma Yexudit”ning chiqishi hukmron koalitsiyaning qulashiga va muddatidan oldin saylovlarga olib kelmaydi. Biroq Smotrich agar hukumat jangovar harakatlarni tiklash o‘rniga sulhning birinchi bosqichidan ikkinchi bosqichiga o‘tishga qaror qilsa, koalitsiyadan chiqishni va’da qiladi.
Isroil va HAMAS G‘azo sektorida 15 oylik jangovar harakatlardan so‘ng sulh tuzishga kelishib oldi. O‘t ochishni to‘xtatish va garovga olinganlarni ozod qilishni o‘z ichiga olgan birinchi bosqich 19-yanvar kuni boshlandi. Dastlabki bosqichda HAMAS garovdagilar evaziga Isroil qamoqxonalarida saqlanayotgan 90 nafar falastinlik mahbusni ozod qiladi.
Izoh (0)