HAMAS va Isroil o‘rtasidagi sulh xavf ostida va u barbod bo‘lishi mumkin. Bu haqda harakat a’zosi Bassem Naim ma’lum qildi.
Naim Isroilni olti haftalik o‘t ochishni to‘xtatish kelishuvining birinchi bosqichida belgilangan majburiyatlarni bajarishni kechiktirishda aybladi.
Urushni qayta boshlash bizning xohishimiz ham, qarorimiz ham emas, dedi siyosiy byuro a’zosi.
Shuningdek, u HAMAS Qatarda kelishuvning ikkinchi bosqichi tafsilotlarini muhokama qilish uchun Isroil bilan bilvosita muzokaralar o‘tkazishga hamon tayyor ekanligini ta’kidladi.
Bu muzokaralar 3-fevralda boshlanishi kerak edi, ammo tomonlar hali muzokaralarga kirishmagan, deya qo‘shimcha qildi Naim.
Isroil va HAMAS o‘rtasida o‘t ochishni to‘xtatish kelishuvi va asirlar almashinuvi
HAMAS va Isroil o‘rtasida o‘t ochishni to‘xtatish va asirlarni almashish bo‘yicha kelishuv 19-yanvar kuni kuchga kirdi.
Asirlar almashinuvining dastlabki to‘rt bosqichida Isroil qamoqxonalaridan 583 nafar falastinlik mahbus, shuningdek, G‘azo sektoridagi 13 nafar isroillik va 5 nafar taylik mahbus ozod qilindi.
8-fevral kuni Isroil armiyasi uch nafar isroillik asirning ozod etilishiga javoban 183 nafar falastinlik mahbusni qamoqdan chiqardi. Ulardan 18 nafari umrbod, 54 nafari esa uzoq muddatli qamoq jazosiga hukm qilingan. Yana 111 nafari 2023-yil 7-oktyabrda Isroil hujumlari boshlanganidan keyin G‘azo sektorida qo‘lga olingan falastinliklardir.
Umuman olganda, o‘t ochishni to‘xtatish to‘g‘risidagi kelishuvni amalga oshirish uch bosqichda o‘tkaziladi. 42 kun davom etadigan kelishuvning birinchi bosqichi doirasida 1900 dan ortiq falastinlik va 33 nafar isroillik ozod qilinishi kutilmoqda.
Izoh (0)