Isroil HAMAS yetakchisi Yahyo Sinvarning jasadini G‘azoda o‘t ochishni to‘xtatish va garovga olinganlarni ozod qilish bo‘yicha kelishuv doirasida qaytarishni rejalashtirmayapti. Bu haqda Isroilning Ynet portali xabar berdi.
Avvalroq Al-Arabiya telekanali Falastin tomoni kelishuvning birinchi bosqichi doirasida Sinvarning jasadini topshirishni talab qilayotgani haqida ma’lumot tarqatgandi. 13-yanvar kuni Dohadagi maslahatlashuvlardan so‘ng Qatar Isroil va HAMASga otashkesim bo‘yicha kelishuvning yakuniy loyihasini bergan.
U falastinlik mahbuslar evaziga garovdagilarni ozod qilish, o‘t ochishni to‘xtatish, shuningdek, anklavni boshqarishning yangi tizimini muhokama qilish bilan bog‘liq uch bosqichli kelishuvni nazarda tutadi. Bitim AQSH prezidenti etib saylangan Donald Trampning inauguratsiyasidan oldin imzolanishi kutilmoqda.
HAMAS bitimning yakuniy loyihasiga e’tiroz bildirmagani aytilgan. Ikkala tomon ham garovdagilar va mahbuslarni ayirboshlashga tayyorgarlik ko‘rmoqda.
Yahyo Sinvar 2017-yildan buyon G‘azo sektorida HAMASni boshqargan. U guruhning Isroil G‘azoga bostirib kirishiga mudofaaviy javobini boshqargan va o‘t ochishni to‘xtatish bo‘yicha muzokaralarda qatnashgan. Sinvar 2024-yilning iyul oyida HAMAS siyosiy yetakchisi Ismoil Haniya va G‘azoda yuqori darajali qo‘mondon Muhammad Deif o‘ldirilganidan so‘ng HAMASga rahbarlik qildi. U 2024-yil 16-oktyabr kuni Isroil operatsiyasi oqibatida vafot etdi.
Isroil Sinvarni 2023-yil 7-oktyabrda 1139 kishining o‘limi va 250 ga yaqin kishi garovga olingan HAMAS operatsiyasini rejalashtirganlikda ayblaydi. Isroilning G‘azo sektoridagi harbiy amaliyotlari oqibatida 46 mingdan ortiq kishi halok bo‘ldi va infratuzilma keng miqyosda vayron bo‘ldi.
Izoh (0)