Фаластиннинг ҲАМАС ҳаракати воситачилар билан музокаралар ижобий руҳда ўтганини эълон қилди ва шу муносабат билан Ғазо секторида ўт очишни тўхтатиш, жумладан, белгиланган муддатда гаровга олинганларни фаластинлик маҳбусларга алмашиш бўйича келишувга риоя қилишини тасдиқлади.
Ғазодаги ҲАМАС етакчиси Халил ал-Ҳайя бошчилигидаги музокара делегацияси Қоҳирада Миср умумий разведка бошқармаси бошлиғи Ҳасан Рашад билан музокаралар ўтказди. Шунингдек, Қатар бош вазири ва ташқи ишлар вазири Муҳаммад Абдул Раҳмон ал-Тани билан телефон орқали мулоқот бўлди. Маслаҳатлашувлар ижобий руҳда ўтди ва ҲАМАС келишув шартларини, жумладан, белгиланган муддатларда асирларни гаровга олинганларни маҳбусларга алмашиш жараёнини амалга оширишни давом эттиришини тасдиқлайди, дейилади ҳужжатда.
Ҳаракатнинг таъкидлашича, унинг вакиллари воситачилар билан музокаралар чоғида “битимнинг барча шартларини бажариш зарурлигига”, хусусан, Ғазога катта ҳажмдаги гуманитар ёрдам етказилиши кераклигига эътибор қаратган. ҲАМАС анклавга Ғазо аҳолисини вақтинча жойлаштириш учун чодирлар, шунингдек, вайроналарни тозалаш учун оғир техника, ёқилғи ва дори-дармонлар олиб кирилиши зарурлигини қайд этган. Ҳаракат вакилларига кўра, воситачилар уларни “бу талабларнинг барчаси бажарилишини кузатиб боришга” ишонтирган.
ҲАМАС баёноти эълон қилинганидан кўп ўтмай, Мисрнинг “Ал-Қоҳира ал-Ихбария” телеканали Қоҳира ва Доҳа Ғазо секторида ўт очишни тўхтатиш бўйича келишувни амалга ошириш йўлидаги тўсиқларни бартараф эта олгани ҳақида баёнот берди. Канал манбасига кўра, “ҳар икки томон — Исроил ва ҲАМАС ярашув битими шартларига амал қилади”.
ҲАМАС нега гаровга олинганларни беришни тўхтатди?
Фаластин ҳаракати Исроилни ўт очишни тўхтатиш тўғрисидаги келишувни бузганликда, жумладан, Ғазодаги фаластинликларга ҳаво ҳужумлари уюштирганликда айблаб, гаровга олинганларни озод қилиш келаси шанба кунига қолдирилишини айтган.
Сўнгги уч ҳафта давомида биз душман томонидан келишув шартларининг доимий равишда бузилишини кузатдик, деди ҲАМАСнинг ҳарбий қаноти ҳисобланмиш “Иззаддин ал-Қассам бригадалари” гуруҳи вакили Абу Убайда.
ҲАМАС шу муносабат билан 15 февраль куни озод қилиниши кутилаётган асирларни Исроилга қайтаришни кейинги огоҳлантиришгача кечиктиришга қарор қилган. У Исроил келишув қоидаларига риоя қилиши ва сўнгги ҳафталарда етказилган зарарни қоплаши кераклигини таъкидлаган. Кейинги алмашинув шанба кунига белгиланган бўлиб, унда юзлаб фаластинлик маҳбуслар эвазига уч нафар исроиллик гаровга олинганларни озод қилиш режалаштирилганди.
Исроилни келишувни мунтазам равишда бузишда айблаган Абу Убайданинг таъкидлашича, айбловлар “кўчирилган фаластинликларга Ғазо шимолига қайтишга рухсат беришни кечиктириш, ҳаво ҳужумлари ва секторнинг турли ҳудудларини ўққа тутиш, шунингдек, келишувларга мувофиқ гуманитар ёрдам етказиб беришга кўмаклашишга қодир эмасликни ўз ичига олади”.
Изоҳ (0)