O‘zbekistondagi barcha davlat idoralarining rasmiy saytlari gov.uz domeniga o‘tkaziladi. Bu haqda “Davlat organlari va tashkilotlarining rasmiy veb-saytlari faoliyatini yanada takomillashtirish chora-tadbirlari to‘g‘risida”gi hukumat qarorida belgilandi.
Qarorga ko‘ra, 2025-yil 1-martdan barcha davlat organlari va tashkilotlari Uzinfocom bilan shartnoma tuzib, rasmiy veb-saytlari va portallari faoliyatini faqatgina hukumat portali – gov.uz orqali yo‘lga qo‘yadi.
Qarorga ko‘ra, rasmiy veb-sayt Yagona platformaga o‘tkazilganidan so‘ng bir hafta muddatda eski rasmiy veb-saytlar domen manzillarini hamda veb-sayt va undagi ma’lumotlarni saqlab qolgan holda, Yagona platformadagi rasmiy veb-saytlar manziliga yo‘naltiriladi yoki ularning faoliyati to‘xtatiladi.
Davalat organlarining Yagona platformaga o‘tkaziladigan saytlari faoliyatini texnik qo‘llab-quvvatlash hamda ularga xizmat ko‘rsatish bo‘yicha sarf-xarajatlar belgilangan tartibda tasdiqlangan tariflarga muvofiq davlat organlari bilan Yagona platforma operatori o‘rtasida tuziladigan shartnoma asosida mazkur davlat organlarining byudjetdan tashqari mablag‘lari, davlat byudjeti mablag‘lari hamda qonunchilikda taqiqlanmagan boshqa manbalar hisobidan moliyalashtiriladi.
“Kiberxavfsizlik markazi” DUK Raqamli texnologiyalar vazirligi bilan birgalikda Yagona platformani har olti oyda beg‘araz asosda kiberxavfsizlik talablariga muvofiqligi yuzasidan ekspertizadan o‘tkazib boradi hamda kiberxavfsizlikni bo‘yicha ta’minlash doimiy monitoringni amalga oshiradi.
Hukumat doirasida amalga oshirilayotgan tadbirlar to‘g‘risidagi axborotlarni rasmiy veb-saytda joylashtirilishidan avval bosh vazir matbuot xizmati bilan kelishilgan xolda, amalga oshiriladi.
Izoh (0)