Suriya prezidenti Bashar Asad qurolli muxolifat vakillari bilan hokimiyatni topshirish bo‘yicha kelishuvga erishishga uringan. Bu haqda Bild xabar berdi.
Ma’lumotlarga ko‘ra, 7-dekabr kuni Dohada Bashar Asadning iste’fosi va uning Rossiyaga uchib ketishi masalasi bo‘yicha muzokaralar olib borilgan. Hokimiyat topshirilgandan so‘ng Suriyadagi harbiy harakatlar to‘xtatilishi, hokimiyat o‘tish davri hukumatiga, keyinchalik esa isyonchilarga topshirilishi ko‘zda tutilgan.
Bu reja “Hayot Tahrir ash-Shom” islomiy guruhi emas, balki Turkiya tomonidan qo‘llab-quvvatlanadigan “Suriya milliy armiyasi” yetakchi siyosiy kuch bo‘lishini nazarda tutgan. Biroq, qandaydir sabablarga ko‘ra, reja amalga oshmagan.
Suriyada isyonchilar Damashqni egalladi
28-noyabr kuni Suriya muxolifatining qurolli guruhlari, jumladan, “Hayot Tahrir ash-Shom” jangchilari Halab viloyatining g‘arbiy hududlarida hukumat qo‘shinlariga yirik hujum boshladi. Ular Halab shahrini olgach, keyingi bir yarim hafta ichida Xoms, Xama shaharlarini ishg‘ol qildi va Suriya poytaxti Damashqqa yetib keldi.
Suriya prezidenti Bashar Asad oilasi bilan mamlakatni tark etgani haqida xabarlar tarqaldi. Syrian Air aviakompaniyasi samolyoti Damashq aeroportidan taxminan isyonchilar poytaxtni qo‘lga kiritgani haqida xabar tarqalgan paytda parvoz qilgan. Suriyaning xorijdagi asosiy muxolifat guruhi rahbari Hodi al-Bahro ham Damashq endi “Bashar Asadsiz” ekanini ta’kidlagan. Keyinroq Reuters nashri Asad bortida bo’lgan samolyot radarlardan yo’qolgani, ehtimol, urib tushirilgan bo’lishi mumkinligini ma’lum qildi.
Bosh vaziri hokimiyatni topshirishga tayyor
Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan. U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Suriya bosh vaziri Muhammad G‘ozi al-Jaloliy o‘z uyidan chiqib, qurolli shaxslar hamrohligida muxolifat yetakchisi bilan uchrashish uchun ketdi.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)