Italiyaning Belkastro shahri meri Antonio Torkya g‘alati qarorni qabul qildi. Unga ko‘ra, mahalliy aholiga kasal bo‘lish — tibbiy yordam, ayniqsa, shoshilinch yordam talab qiladigan har qanday kasallikni yuqtirmaslik buyurildi.
Foto: CNN
Shahar meri shu yo‘l orqali davlat mutasaddilarining e’tiborini tortish va Belkastro shahridagi tibbiyot bilan bog‘liq muammolarni hal qilishni maqsad qilgan. Qaror hujjatida aytilishicha, mahalliy aholiga jiddiy viruslarni yuqtirish va shoshilinch tibbiy yordamga muhtoj bo‘lishi mumkin bo‘lgan faoliyat bilan shug‘ullanish taqiqlanadi.
Merning so‘zlariga ko‘ra, provokatsiyaga to‘la bunday tashabbus Italiyaning sog‘liqni saqlash idoralari va Katanzaro prefekturasining e’tiborini jalb qilishi kerak, bu esa Belkastrodagi kasalxonalar va mahalliy tibbiyot xodimlari soni bilan bog‘liq ko‘plab masalalarni hal qilishga yordam beradi. Antonio Torkya avvalroq hukumat vakillari bilan bog‘lanishga uringan, biroq hech qanday javob olmagan. Bu safar u barcha e’tirozlar ko‘rib chiqilishiga umid qilmoqda:
“Ishonamanki, mening tashabbusim vaziyatni o‘zgartirishga qodir bo‘lgan mutasaddilar tomonidan o‘rganib chiqilishiga turtki bo‘ladi”, deydi mer.
Belkastro aholisi taxminan 1300 kishini tashkil etadi, ularning yarmi nafaqaxo‘rlardir. Shaharda birgina sog‘liqni saqlash punkti mavjud. Eng yaqin shoshilinch tibbiy yordam punkti esa 45 kilometr uzoqlikda joylashgan. Butun shaharda faqat bitta tez tibbiy yordam shifokori ishlaydi va u tungi vaqtda, bayram va dam olish kunlarida aholiga yordam ko‘rsata olmaydi.
Izoh (0)