Bashar Assadning aviahalokatda halok bo‘lgani ehtimoli yuqori. Bu haqda Suriyadagi ikki manbaga tayanib Reuters xabar bermoqda.
Flightradar ma’lumotiga ko‘ra, Asad bortida bo‘lgani taxmin qilinayotgan samolyot Rossiya harbiy-havo va dengiz bazalari joylashgan Suriyaning qirg‘oqbo‘yi hududlari tomon yo‘l olgan. Biroq keyinchalik bort keskin burilib, pastga tusha boshlagan, keyin esa 500 metr balandlikda radarlardan g‘oyib bo‘lgan.
“Samolyot radardan g‘oyib bo‘lgan bo‘lishi mumkin, transponder o‘chirilgandir, ammo samolyot urib tushirilgan bo‘lishi ehtimoli katta”, dedi suriyalik manba.
Suriyada isyonchilar Damashqni egalladi
8-dekabr kuni Suriyada isyonchilar Xoms shahrini bosib olganlaridan so‘ng mamlakat poytaxti Damashqqa bostirib kirganliklarini e’lon qildi. Suriya prezidenti Bashar Asad oilasi bilan mamlakatni tark etgani haqida xabarlar tarqaldi. Syrian Air aviakompaniyasi samolyoti Damashq aeroportidan taxminan isyonchilar poytaxtni qo‘lga kiritgani haqida xabar tarqalgan paytda parvoz qilgan. Suriyaning xorijdagi asosiy muxolifat guruhi rahbari Hodi al-Bahro ham Damashq endi “Bashar Asadsiz” ekanini ta’kidlagan.
Bosh vaziri hokimiyatni topshirishga tayyor
Al Arabiya telekanaliga ko‘ra, Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan. U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Suriya bosh vaziri Muhammad G‘ozi al-Jaloliy o‘z uyidan chiqib, qurolli shaxslar hamrohligida muxolifat yetakchisi bilan uchrashish uchun ketdi.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)