Iroq hukumati 7 va 8-dekabr kunlari mamlakat chegarasini kesib o‘tgan suriyalik harbiylarni joylashtirish uchun chodirlar qurishni boshladi. Bu haqda Shafaq News xabar berdi.
Ma’lum qilinishicha, Suriya armiyasining ikki ming askari harbiy formada Iroq hududiga kirgan, qo‘shni respublika kuchlari ularni qabul qilgan. Hozirda ular uchun qurilayotgan lager Suriya chegarasidagi “Al-Qayim” nazorat-o‘tkazish punkti yonida tashkil etilgan.
Hokimiyat harbiy xizmatchilarga zarur yordam ko‘rsatadi va vaqtincha joylashtirishni ta’minlaydi. Ammo chegarani kesib o‘tayotgan suriyalik askarlarning keyingi taqdiri haqida qaror qabul qilinmagan.
Iroq va Suriya chegarasi janglar fonida to‘liq yopilgan. Iroq hukumati Suriyadagi voqealar mamlakat xavfsizligiga ta’sir etishiga yo‘l qo‘ymaslikka harakat qilmoqda.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etgani haqida xabarlar tarqaldi.
Suriyaning xorijdagi asosiy muxolifat guruhi rahbari Hodi al-Bahro ham Damashq endi “Bashar Asadsiz” ekanini ta’kidladi. Keyinroq Reuters nashri Asad bortida bo’lgan samolyot radarlardan yo’qolgani, ehtimol, urib tushirilgan bo’lishi mumkinligini ma’lum qildi.
Rossiya Tashqi ishlar vazirligi esa Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi.
Bosh vaziri hokimiyatni topshirishga tayyor
Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan.
U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Suriya bosh vaziri Muhammad G‘ozi al-Jaloliy o‘z uyidan chiqib, qurolli shaxslar hamrohligida muxolifat yetakchisi bilan uchrashish uchun ketdi.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)