O‘zbekiston va Ozarbayjon ID-kartalarni o‘zaro tan olish masalasini muhokama qilmoqda, deb xabar berdi “Dunyo” axborot agentligi.
Ma’lum qilinishicha, O‘zbekiston elchixonasi ko‘magida O‘zbekiston va Ozarbayjonning tegishli vazirlik va idoralari vakillari o'rtasida ikki davlat fuqarolarining ID-kartalarini chegaradan o‘tish uchun rasmiy hujjat sifatida tan olish imkoniyati muhokamasiga bag‘ishlangan onlayn uchrashuv tashkil etildi.
Yig‘ilishida ta’kidlanishicha, ushbu sa’y-harakat sayohatlarni yengillashtirish va ikki tomonlama aloqalarni mustahkamlashga xizmat qiladi. Tomonlar fuqarolar harakatini soddalashtirish, ikki tomonlama munosabatlarni mustahkamlash va migratsiya siyosati sohasidagi hamkorlikni kengaytirishga qaratilgan ushbu qadam muhim ahamiyatga ega ekanligini qayd etdi.
ID-kartalardan foydalanish O‘zbekiston va Ozarbayjon fuqarolariga chet el pasportini olmasdan turib chegarani kesib o‘tish imkonini beradi, bu esa sayohat qilish qulayligini oshiradi va mamlakatlar o‘rtasidagi integratsiyani mustahkamlaydi.
Shuningdek, mazkur qarorning qabul qilinishi O‘zbekiston va Ozarbayjon o‘rtasidagi savdo-iqtisodiy, madaniy va sayyohlik aloqalarini rivojlantirishga ijobiy ta’sir ko‘rsatishi kutilmoqda.
ID-kartalarini o‘zaro tan olish
Shavkat Mirziyoyev 2024-yil 9-avgust kuni Markaziy Osiyo davlatlari rahbarlari Maslahat uchrashuvida Markaziy Osiyo mamlakatlari milliy ID-kartalarini o‘zaro tan olish taklifini ilgari surgan. Prezident turistik almashuvni kengaytirish maqsadida “Bitta tur — butun mintaqa” tamoyili bo‘yicha milliy ID-kartalarni o‘zaro tan olish va ommaviy turistik mahsulotlarni ishlab chiqish masalalarini o‘rganib chiqishni taklif qilgandi.
2023-yil 1-sentyabrdan boshlab ichki hujjat — fuqaro ID-kartasini taqdim etgan holda O‘zbekiston—Qirg‘iziston chegarasini kesib o‘tish tartibi amal qilib kelmoqda. O‘zbekiston—Qirg‘iziston fuqarolari uchun Davlat chegarasini kesib o‘tishning soddalashtirilgan yagona tartibiga ko‘ra, ikki davlat fuqarolari 60 kungacha identifikatsiya ID-kartasi bilan ikki davlat hududlariga kirishlari, harakatlanishlari va unda bo‘lib turishlari mumkin.
2024-yil noyabrida Shavkat Mirziyoyev Qonunchilik palatasi majlisida Qozog‘iston va Tojikistonga ham ID-karta orqali o‘tish imkoniyati yaratilishini ma’lum qildi. Qayd etilishicha, Markaziy Osiyo davlatlari o‘rtasida yaxshi qo‘shnichilik munosabatlarini yanada mustahkamlash, mintaqaviy xavfsizlik va barqarorlikni ta’minlash tashqi siyosatda ustuvor yo‘nalish bo‘lib qoladi.
Izoh (0)