Американинг CNN телеканали маълумотларига кўра, сўнгги 6 ой ичида Украинадаги фронтда камида 5 нафар америкалик кўнгилли ҳалок бўлган, 2 нафарининг жасади ўтган жума куни Украинага қайтарилган.
Қўшма Штатлардан жами 20 дан ортиқ кўнгиллилар бедарак йўқолган деб ҳисобланмоқда.
Жангда ҳалок бўлган камида беш нафар америкалик кўнгиллиларнинг жасадлари сўнгги олти ой ичида жанг майдонидан олиб кетилмаган. Улардан иккитаси Россия томонидан босиб олинган ҳудуддан 24 январь куни узоқ давом этган музокаралардан сўнг Украина тупроғига қайтарилди.
Бедарак йўқолган америкаликларнинг қариндошлари CNN телеканалига ўз фарзандларини дафн эта олмасликлари, яқинларини расман вафот этган деб эълон қила олмасликлари, шунингдек, уларни интернетда таъқиб қилаётган “Россия интернет-троллари” қийноққа солаётганини айтишган.
Украинанинг шарқидаги Покровск яқинида сентябрь ойи охирида икки америкалик ҳалок бўлган, деб хабар бермоқда омон қолганлар ва уларнинг яқинлари.
Улардан бирортасининг жасади топилмаган.
Миссури штатидан 25 ёшли собиқ америкалик ҳарбий Закари Форд ва ҳарбий тажрибаси бўлмаган яна бир америкалик Новогродовка қишлоғи яқинидаги кўприкни портлатиш пайтида дрон томонидан ўлдирилган.
АҚШнинг собиқ денгиз пиёдаси, 41 ёшли пенсилваниялик Кори Навроцкий октябрь ойида Россиянинг Брянск вилоятидаги жангларда ҳалок бўлганди. Узоқ давом этган музокаралардан сўнг унинг жасади 800 га яқин ҳалок бўлганлар билан Украинага қайтарилди.
Украинадаги урушда бедарак йўқолган хорижликларни қидириш билан шуғулланувчи Weatherman Foundation’дан Лорен Гиёмнинг маълум қилишича, ҳозирда ташкилот 18 мамлакатдан 88 нафар ҳалок бўлган ёки бедарак йўқолган шахслар бўйича шуғулланмоқда.
Уларнинг аксарияти бедарак йўқолган, дея аниқлик киритди Гиём.
Шунингдек, Россия ва Украина ўртасидаги жангларда Шимолий кореялик ҳарбийлар ҳам ҳалок бўлаётгани хабар берилмоқда. Ғарб разведкаси январь ойи ўрталарига келиб Курск вилоятида 4 мингга яқин шимолий кореялик ҳалок бўлгани ва яраланганини маълум қилган. Бу Украинага қарши урушда қатнашган КХДР аскарлари умумий сонининг тахминан учдан бирига тенг.
Украина армияси бундай йўқотишларни бир қатор сабаблар билан изоҳламоқда. Жумладан, Шимолий Корея аскарлари “Иккинчи жаҳон уруши давридаги каби” пиёда ҳужум қилган ва Украина дронлари ҳамда артиллерияси учун осон нишон бўлган. Улар одатда нишонга олинсалар ҳам, ҳужумни давом эттирган.
Бундан ташқари, асирга тушмаслик учун Шимолий Корея аскарлари ўзларини гранаталар билан портлатган. Шунингдек, КХДР аскарлари тил билан боғлиқ муаммо туфайли Россия қўшинлари билан контактга яхши киришмаган. Ҳатто тасодифан Россия позицияларига ҳужум қилган.
Катта йўқотишларга қарамай, Пхеньян яқин икки ой ичида Россияга ҳарбийларнинг янги гуруҳини юбориши мумкин. Шимолий Корея Москвани қўллаб-қувватлаш учун 100 минггача аскар беришга тайёрлигини маълум қилгани айтилмоқда. Украина разведкаси раҳбари Кирилл Буданов КХДРдан қўшимча куч келиши мумкинлигини тасдиқлаган. Аммо Киевда Шимолий Кореянинг кўп сонли янги жанговар қисмлари пайдо бўлишини кутмаётганини айтган.
Изоҳ (0)