Rossiya Suriyaning Tartus shahridagi harbiy bazasidan texnikalarini olib ketishni boshladi. Sun’iy yo‘ldosh tasvirlarida baza yaqinidagi yuk kemalari texnikalarni olib ketganini ko‘rish mumkin.
Yuk ortish xavfsizligini Rossiya harbiy-dengiz kuchlarining jangovar kateri nazorat qilmoqda. Sanksiyalar ostidagi “Oboronlogistika” kompaniyasiga tegishli bo‘lgan Rossiyaning “Sparta” va “Sparta II” yuk kemalari Tartus portiga yetib kelgandi.
O‘tgan haftalarda port hududiga ko‘plab harbiy texnikalar olib kelingan. Gap o‘nlab transport vositalari va ko‘p miqdordagi uskunalar haqida ketmoqda. BBC’ning yozishicha, Rossiya harbiylari dekabr oyi o‘rtalarida, Bashar Asad rejimi ag‘darilgandan so‘ng, Tartusda texnikani to‘plashni boshlagan.
Suriyaning yangi hukumati “Stroytransgaz” bilan 2019-yilda tuzilgan (49 yilga mo‘ljallangan) Tartus portiga sarmoya kiritish to‘g‘risidagi shartnomani bekor qilgan. Kompaniya keyingi 4 yil ichida portni modernizatsiya qilishga 500 million dollardan ortiq sarmoya kiritishi kerak edi. Endi suriyaliklar portning eskirgan inshootlarini o‘zlari tiklaydi. Faqat shundan keyingina portga Rossiyaning yuqoridagi yuk kemalariga kirishga ruxsat berilgandi.
Harbiy-dengiz tahlilchisi Frederik Van Lokerenga ko‘ra, hozirda portda yana ikkita rus harbiy kemasi — “Ivan Gren” va “Aleksandr Otrakovskiy” turgan bo‘lishi mumkin. Ular evakuatsiyada ham yordam berishi mumkin. Ushbu kemalar haqidagi ma’lumotlarni Ukraina harbiy razvedkasi ham tasdiqlagan.
“Rossiya uchun 49 yillik ijara shartnomasi bekor qilingandan so‘ng, u endi Tartusda harbiy ishtirokini saqlab qolishga umid qila olmasligi aniq bo‘ldi va shuning uchun u yerda qolish va evakuatsiyani kechiktirishning ma’nosi yo‘q”, deydi tahlilchi.
Texnika va uskunalarni olib chiqish biroz vaqt oladi. Tasvirlardan ma’lum bo‘lishicha, “Sparta II” bandargohdan chiqib ketganidan keyin konteynerlar va harbiy texnikalarning katta qismi g‘oyib bo‘lgan. “Sparta”ga yuklash ishlari davom etmoqda.
Rossiya armiyasining texnika va mol-mulkining katta qismi havo orqali olib ketilmoqda. Kemalar faqat samolyotlarga yuklanishi mumkin bo‘lmagan yoki juda qimmatga tushadigan narsalarni evakuatsiya qilmoqda, deb yozadi Rossiya harbiy aviatsiyasi bilan bog‘liq Fighterbomber kanali.
BBC, shuningdek, Suriyaning Xmeymim shahridagi Rossiya aviabazasida faollik davom etayotganini ta’kidladi. Sun’iy yo‘ldosh tasvirlari shuni ko‘rsatadiki, Asad Suriyadan qochganidan beri Rossiyaning yirik samolyotlari muntazam ravishda harbiy texnika bilan yuklanmoqda.
Izoh (0)