The New York Times gazetasi AQSH razvedkasiga tayanib yozishicha, Ukrainadagi urush paytida har ikki tomondan 500 mingga yaqin harbiy xizmatchi halok bo‘lgan va yaralangan.
Shu bilan birga, amerikalik rasmiylar yo‘qotishlarni hisoblash qiyinligini ta’kidladi, chunki Kiyev ma’lumotlarni oshkor etmayapti, Moskva esa yo‘qotishlar haqida ancha avval hisobot bergan, unda ham qurbonlar sonini kamaytirib ko‘rsatgan bo‘lishi mumkin.
AQSH razvedkasining ma’lumotlariga ko‘ra, Rossiyaning Ukrainadagi yo‘qotishlari 300 ming kishiga yetgan. Bundan 120 ming askar halok bo‘lgan, 180 ming kishi yarador bo‘lgan
Ukraina armiyasida esa halok bo‘lganlar 70 ming kishini, yaradorlar 120 ming harbiyni tashkil etmoqda. Bu raqamlarni mustaqil ekspertlar tasdiqlay olmaydi.
2022-yil noyabr oyida AQSH Bosh shtab boshlig‘i Mark Milli har ikki tomondan 100 mingdan ortiq odam halok bo‘lgani va yaralanganini aytgandi. NYT ta’kidlashicha, qish va bahorda qurbonlar va yaradorlar soni keskin oshgan, xususan, Ukraina sharqidagi Baxmut atrofida bir necha oy davom etgan shiddatli janglar ko‘plab yo‘qotishlarga sabab bo‘lgan.
Bundan tashqari, hozirgi qarshi hujumda minglab ukrainalik harbiylar halok bo‘ldi yoki yaralandi, deb yozadi gazeta AQSH rasmiylariga tayanib.
Rossiyaning yo‘qotishlar haqidagi rasmiy hisoboti
Rossiya Mudofaa vazirligi oxirgi marta 2022-yil 21-sentabrda urushdagi yo‘qotishlar haqida rasman hisobot bergan edi. O‘shanda vazirlik 5 937 nafar rossiyalik harbiy halok bo‘lganini e’lon qilgan.
Aprel oyida The New York Times AQSH razvedka xizmatlarining internetda tarqalgan hujjatlariga tayanib, Rossiya Federal xavfsizlik xizmati mamlakat Mudofaa vazirligini “Rossiyaning Ukrainadagi yo‘qotishlarini yashirganlikda ayblayotgani” haqida xabar berdi. Razvedka xizmati ma’lumotlariga ko‘ra, vazirlik o‘z hisobotlarida Milliy gvardiya jangchilari, “Vagner” yollanma askarlari va Chechenistondan Ukrainaga yuborilgan harbiylar orasidagi yo‘qotishlarni hisobga kiritmayapti. FXXning o‘sha paytdagi versiyasiga ko‘ra, Ukrainada o‘ldirilgan va yaralangan Rossiya harbiylari soni taxminan 110 ming kishini tashkil qiladi.
Izoh (0)