Ukrainaning Milliy korrupsiyaga qarshi byurosi (NABU) Ukraina mudofaa vaziri Rustem Umerovning ehtimoliy jinoyati bo‘yicha Ukraina Korrupsiyaga qarshi kurash markazining (KQKM) arizasi asosida ish yuritishni ro‘yxatdan o‘tkazdi.
Ukraina Mudofaa vazirligi rahbari hokimiyat yoki lavozim mavqeyini suiiste’mol qilishda gumon qilinmoqda. Ushbu modda uch yildan olti yilgacha ozodlikdan mahrum qilish jazosini nazarda tutadi.
KQKM ma’lumotlariga ko‘ra, 24-yanvar kuni Umerov Mudofaa xaridlari agentligi (MXA) kuzatuv kengashining direktori Marina Bezrukova bilan shartnomani bir yilga uzaytirish to‘g‘risidagi qarorini bajarishdan bosh tortgan.
Vazir, shuningdek, ushbu qarorni yoqlab ovoz bergan kuzatuv kengashining ikki a’zosi — Taras Chmut va Yuriy Jigirani ham ishdan bo‘shatgan, deb aytiladi Korrupsiyaga qarshi kurash markazi xabarida.
Shuningdek, markazda mudofaa xaridlari agentliklari huzurida kuzatuv kengashlarini tashkil etish ushbu tuzilmalarni tashqi ta’sirdan himoya qilish uchun NATOning asosiy tavsiyasi bo‘lgani ta’kidlandi.
Umerov harbiy xaridlar va armiyani ta’minlashdagi muammolar uchun Bezrukovani ayblagan.
Oliy Rada Umerovning so‘roq uchun chaqirilishini qo‘llab-quvvatladi
2024-yil 3-dekabr kuni Oliy Rada Ukraina harbiylari tomonidan “Ukroboronprom” ishlab chiqargan sifatsiz minalarni olganlikda ayblangan Umerovning so‘roqqa chaqirilishini qo‘llab-quvvatladi.
Umerov avvalroq “Ramshteyn” formatidagi Aloqa guruhining 25-yig‘ilishida taqdim etilgan Ukrainaning 2025-yilga mo‘ljallangan harbiy strategiyasi haqida ma’lumot bergan edi.
“Uchrashuv davomida biz to‘rtta asosiy ustuvorlikka asoslangan strategiyamizni taqdim etdik: front chizig‘ini barqarorlashtirish, Ukrainaning mudofaa qobiliyatini mustahkamlash, havo va dengiz yo‘llarini himoya qilishni kuchaytirish, bosqinchining keng ko‘lamli ustunlikka erishishga urinishlariga munosib javob berish”, deb yozgan Umerov Facebook’dagi sahifasida.
U “imkoniyatlar koalitsiyasi: aviatsiya, havo hujumidan mudofaa, dengiz imkoniyatlari, artilleriya, zirhli texnika, IT, dronlar va minalardan tozalash texnologiyalari” doirasida ishlab chiqilgan Ukraina mudofaa kuchlarini 2027-yilgacha rivojlantirish bo‘yicha “yo‘l xaritasi” tasdiqlanganini aytdi.
“Biz hamkorlikning yangi bosqichiga qadam qo‘ydik: urushning dolzarb ehtiyojlarini qondirishdan tashqari, armiyamizning uzoq muddatli salohiyatini shakllantirish ustida ham ish olib boramiz”, deya xulosa qilgan Umerov.
Izoh (0)