Ukrainaning Toshkentdagi elchixonasi O‘zbekiston fuqarolariga Rossiyaning ushbu davlatga qarshi urushida qatnashmaslik va Ukrainaning vaqtincha bosib olingan hududlariga bormaslikka chaqirdi.
Elchixona murojaatida aytilishicha, Rossiya Ukrainaning vaqtincha bosib olingan hududlarida olib borilayotgan jangovar harakatlar chog‘ida shaxsiy tarkibining katta yo‘qotishlari tufayli Ukrainaga qarshi urushda qatnashish uchun xorijiy fuqarolarni jalb qilishga urinmoqda.
Ukraina Qurolli kuchlari Bosh shtabi maʼlumotlariga ko‘ra, ishg‘ol qilingan Donetsk viloyati Gorlovka shahrida joylashgan Rossiya bosqinchi kuchlarining bo‘linmalarida O‘zbekiston fuqarolari borligi aniqlangan. Ushbu shaxslar Ukraina chegarasini noqonuniy kesib o‘tib, qurilish ishlarini olib borish uchun kelgan. Mariupolga yetib kelganidan so‘ng ularning pasportlari olib qo‘yilgan va bu fuqarolar ko‘ngillilar sifatida safarbar qilingan.
Elchixona O‘zbekiston fuqarolari eʼtiborini Rossiyaning Ukrainaga qarshi urushida ishtirok etishiga yo‘l qo‘yilmasligiga qaratdi: “Ukrainaga qarshi qurolli tajovuzda qatnashgan chet el fuqarolari Ukraina milliy qonunchiligi va xalqaro huquq normalariga muvofiq jinoiy javobgarlikka tortiladi”.
Avvalroq Rossiyaning Volgograd shahridagi avtobuslarda Rossiya armiyasiga xizmatga qabul qilish to‘g‘risida o‘zbek tilidagi e’lonlar paydo bo‘lgandi. Oyiga 200 ming rubl (taxminan ikki ming dollardan oshadi) va’da qilingan daromaddan tashqari, xizmatga borishni istaganlar Rossiya fuqaroligini soddalashtirilgan tartibda olishi eslatib o‘tiladi. Bunday e’lonlar xorijlik fuqarolar uchun mo‘ljallangani va tojik, qozoq tillarida ham chop etilishi ta’kidlangan.
O‘zbekiston fuqarolariga chet davlatlarining harbiy xizmatiga yollanish qonunan taqiqlanadi!
O‘zbekiston fuqarolari chet davlatlarning (shu jumladan, Rossiyaning) harbiy xizmatiga, xavfsizlik, politsiya, harbiy adliya yoki shunga o‘xshash boshqa organlariga xizmatga kirish, yollangani uchun O‘zbekiston Jinoyat kodeksining 154,1-moddasiga ko‘ra 3 yildan 5 yilgacha ozodlikni cheklash yoki ozodlikdan mahrum qilish bilan jazolanadi.
Bundan tashqari, yollanish uchun ham Jinoyat kodeksining 154-moddasida javobgarlik belgilangan. Unga ko‘ra, yollanma askar bo‘lganlar 7 yildan 12 yilgacha ozodlikdan mahrum etiladi. Bunday javobgarlik boshqa davlatlar (xususan, qo‘shni davlatning) Jinoyat kodekslarida ham belgilangan.
Masalan, Tojikiston Jinoyat kodeksining 401,1-moddasiga ko‘ra 12 yildan 20 yilgacha qamoq jazosi, Qirg‘iziston Jinoyat kodeksining 416-moddasiga ko‘ra 7 yildan 15 yilgacha qamoq jazosi, Qozog‘iston Jinoyat kodeksining 162,1-moddasiga ko‘ra esa 7 yilgacha ozodlikdan mahrum etish jazosi nazarda tutilgan. O‘zbekiston fuqarolari faqat O‘zbekiston armiyasida xizmat o‘tashlari mumkin.
Izoh (0)