Isroil Rossiya-Ukraina urushi boshlanganidan beri Kiyevga eng yirik qurol yetkazib berishni amalga oshirdi.
So‘nggi kunlarda AQSH harbiy-havo kuchlari samolyotlari Ukrainaga yetkazish uchun Isroil aviabazasida saqlanayotgan 90 ga yaqin Patriot raketasini Polshaga olib o‘tdi. Bu haqda operatsiyaning borishi bilan tanish bo‘lgan uchta manba Axios’ga xabar berdi.
Raketalar Ukrainaga qurol-yarog‘ yetkazish markazi vazifasini bajarayotgan Sharqiy Polshadagi Jeshuv shahriga keltirildi. Yevropa va boshqa hududlardagi mojarolar haqida ochiq manbalardan ma’lumot to‘playotgan OSINTdefender tahlilchisi bu ma’lumotni tasdiqladi:
C-17 transport samolyotlari yakshanba kuni Germaniyadagi AQSHning Ramshteyn bazasidan Isroilning janubidagi Xatserim aviabazasiga, so‘ngra Jeshuvga uchib bordi.
Axios manbalariga ko‘ra, qo‘shimcha texnika, jumladan, radarlar va boshqa uskunalar ta’mirlash uchun avval AQSHga yuboriladi.
Isroil 2024-yilning aprelida o‘zining havo hujumidan mudofaa tizimlarini ishlab chiqqani sababli 30 yildan ortiq vaqt oldin berilgan Patriot tizimlarini rasman qurollanishdan chiqardi. Axios manbalariga ko‘ra, shundan so‘ng Ukraina rasmiylari AQSH va Isroilga raketalarni Pentagonga topshirishni taklif qilgan. Reja bo‘yicha Pentagon ularni ta’mirlagach, Ukrainaga jo‘natishi kerak.
Tel Aviv javob berishni bir necha oyga cho‘zdi, chunki ular Rossiya tomonidan javob choralari ko‘rilishidan, masalan, Eronga zamonaviy qurol yetkazib berilishidan xavotirda edi, deyiladi xabarda.
Isroil bosh vaziri Binyamin Netanyaxu ma’muriyati vakili Patriot tizimi AQSHga qaytarilganini tasdiqladi.
Ularning Ukrainaga yetkazib berilgani yoki berilmagani bizga noma’lum, deydi u.
Isroilning yuqori martabali amaldori so‘zlariga ko‘ra, Tel Aviv Moskvani AQSH raketalarini topshirish haqida oldindan ogohlantirgan va “Ukrainaga qurol yetkazib bermasligini” ta’kidlagan.
Izoh (0)