Rossiya Donetsk viloyatida O‘zbekistondan kelgan quruvchilarning pasportlarini olib qo‘yib, ularni “ko‘ngilli” sifatida urushga yubordi. Ukraina Qurolli kuchlari bosh shtabi bu haqda ma’lumot berdi.
Ma’lum qilinishicha, o‘zbekistonliklar Mariupolda qurilish ishlarini olib borishi kerak edi. Rossiya qo‘shinlarining Donetsk viloyatining vaqtincha bosib olingan Gorlovka shahrida joylashgan bo‘linmalarida O‘zbekiston fuqarolari borligi qayd etilgan.
“Ushbu shaxslar Mariupol shahriga qurilish ishlarini olib borish uchun kelgan. Yetib kelgach, pasportlari olib qo‘yilib, ko‘ngillilar sifatida Rossiya Qurolli kuchlari safiga safarbar qilingan”, — deyiladi Bosh shtab xabarida.
Avvalroq Rossiyaning Volgograd shahridagi avtobuslarda Rossiya armiyasiga xizmatga qabul qilish to‘g‘risida o‘zbek tilidagi e’lonlar paydo bo‘lgandi. Oyiga 200 ming rubl (taxminan ikki ming dollardan oshadi) va’da qilingan daromaddan tashqari, xizmatga borishni istaganlar Rossiya fuqaroligini soddalashtirilgan tartibda olishi eslatib o‘tiladi.
Bunday e’lonlar xorijlik fuqarolar uchun mo‘ljallangani va tojik, qozoq tillarida ham chop etilishi ta’kidlangan.
O‘zbekiston fuqarolariga chet davlatlarining harbiy xizmatiga yollanish qonunan taqiqlanadi!
O‘zbekiston fuqarolari chet davlatlarning (shu jumladan, Rossiyaning) harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollangani uchun O‘zbekiston Jinoyat kodeksining 154,1-moddasiga ko‘ra 3 yildan 5 yilgacha ozodlikni cheklash yoki ozodlikdan mahrum qilish bilan jazolanadi.
Bundan tashqari, yollanish uchun ham Jinoyat kodeksining 154-moddasida javobgarlik belgilangan. Unga ko‘ra, yollanma askar bo‘lganlar 7 yildan 12 yilgacha ozodlikdan mahrum etiladi. Bunday javobgarlik boshqa davlatlar (xususan, qo‘shni davlatning) Jinoyat kodekslarida ham belgilangan.
Masalan, Tojikiston Jinoyat kodeksining 401,1-moddasiga ko‘ra 12 yildan 20 yilgacha qamoq jazosi, Qirg‘iziston Jinoyat kodeksining 416-moddasiga ko‘ra 7 yildan 15 yilgacha qamoq jazosi, Qozog‘iston Jinoyat kodeksining 162,1-moddasiga ko‘ra esa 7 yilgacha ozodlikdan mahrum etish jazosi nazarda tutilgan. O‘zbekiston fuqarolari faqat O‘zbekiston armiyasida xizmat o‘tashlari mumkin.
Izoh (0)