Qozog‘iston Rossiyaning “Vagner” xususiy harbiy kompaniyasiga qo‘shilgan 23 yoshli qozog‘istonlik talabani qaytarishga yordam beradi. Ammo u vatanida jinoiy jazoga tortiladi, dedi Qozog‘iston Tashqi ishlar vazirligi rasmiy vakili Aybek Smadiyarov.
Avvalroq ijtimoiy tarmoqlar va ommaviy axborot vositalarida Tomsk davlat universitetida tahsil olgan 23 yoshli Marg‘ulon B. go‘yoki o‘g‘irlab ketilgani haqida xabarlar tarqalgandi. Ta’kidlanishicha, Rossiyada u “Vagner”ga qo‘shilishga majburlangan. Qozog‘iston TIV esa yigit o‘z ixtiyori bilan yollanma askar bo‘lishga qaror qilganini aniqladi.
“Borib ‘Vagner’ safiga qo‘shilish niyatida bo‘lgan yoki buni o‘ylayotgan barcha fuqarolarni ogohlantirishni istardikki, ularga besh yildan to‘qqiz yilgacha qamoq jazosi berilishi mumkin. Bu Qozog‘istonda jinoiy javobgarlikka tortiladi. Ular tasavvur qilgan hech qanday romantika yo‘q. Aytmoqchimanki, yigitlar, bu sizning urushingiz emas. Ehtiyot bo‘ling, oilangiz haqida o‘ylang. Hammangiz kap-katta odamsiz. Bu yigit ham voyaga yetgan, qarorni o‘zi qilgan”, — deydi Aybek Smadiyarov.
Qozog‘iston TIV spikeri vazirlik talabaning qarindoshlari bilan aloqada bo‘lganini va barcha tegishli so‘rovlarni Rossiyaning vakolatli organlariga yuborganini eslatdi. Tashqi ishlar vazirligi imkon qadar fuqaroga har tomonlama yordam ko‘rsatadi, jumladan, zarurat bo‘lsa yigit vataniga qaytganida ham ko‘mak beriladi.
“Ammo shuni hisobga olish kerakki, u Qozog‘istonga qaytganida jinoiy javobgarlikka tortiladi”, — deya qo‘shimcha qildi Aybek Smadiyarov.
Ma’lumot uchun “Vagner” yollanma jangchilari hozirda Ukraina hududidagi harbiy harakatlarda Rossiya tomonidan faol ishtirok etmoqda.
Izoh (0)