Shri-Lanka hukumati Rossiyaning Ukraina urushida mamlakatning 16 nafar fuqarosi halok bo‘lganini maʼlum qildi. Bu haqda mamlakat Mudofaa vazirligi bayonotiga asoslanib, The Moscow Times nashri xabar berdi.
Shri-Lanka Mudofaa vazirligi ushbu holat haqida 15-may kuni maʼlum qilgan. Aholi orasida ruslar uchun yollanma askarlikka ketayotganlar soni ko‘payayotgani aytilgan.
Manbada aytilishicha, mamlakat politsiyasi fuqarolarni urushga jalb qilishga harakat qilayotgan guruhlarni aniqlash uchun surishtiruv boshlagan. Hozirga qadar kamida 288 nafar Shri-Lanka fuqarosi urushga yollanib, mamlakatni tark etgani aniqlangan.
“Biz halok bo‘lgan 16 kishi haqidagi maʼlumotni aniqladik”, — degan Shri-Lanka mudofaa vaziri o‘rinbosari Pramitha Tennakun poytaxt Kolomboda jurnalistlar bilan suhbatda.
Mamlakatdagi hukmron partiya deputati Gamini Valeboda yollanma askarlarning aksariyati Rossiya armiyasi safida jang qilish uchun ketganini bildirgan. Oliy rahbariyat esa bu borada hech qanday izoh bermagan.
Politsiya rasmiylari fuqarolar katta pul vaʼda qilish evaziga urushga chaqirilganini maʼlum qilgan. Shu kabi holatlar qo‘shni Hindiston va Nepalda ham kuzatilgan.
“Bu juda nozik masala. Biz Rossiya bilan ham, Ukraina bilan ham do‘stmiz. Ikkala mamlakat ham biz uchun muhim. Ayni damda biz Rossiya va Ukraina Tashqi ishlar vazirliklari bilan fuqarolarimizni xavfsiz qaytarib kelish borasida gaplashmoqdamiz”, — degan mudofaa vazirligi rasmiysi Pramitha Tennakun.
Izoh (0)