Donetsk viloyatining Velikaya Novoselka qishlog‘i rossiyaliklar nazoratiga o‘tgan bo‘lishi mumkin. Amerika urushni o‘rganish instituti, agar Rossiya Mudofaa vazirligi tomonidan bildirilgan mazkur da’vo tasdiqlansa, rus armiyasida hujum harakatlarini davom ettirish uchun bir nechta variant paydo bo‘lishini ma’lum qildi. Bu haqda ISW’ning navbatdagi hisobotida so‘z boradi.
“Velikaya Novoselka bir nechta daryolar bo‘yida joylashgan bo‘lib, Rossiya armiyasining kelgusi taktik harakatlarini qiyinlashtirishi mumkin. Qolaversa, murakkab relyef sabab rus qo‘shinlarining hudud qo‘lga kiritilgandan keyin G‘arbiy Donetsk yo‘nalishi bo‘ylab operatsion yutuqlarga erishish imkoniyati ham pasayadi”, deb yozadi ISW.
Hisobotda yozilishicha, ruslar aholi punktini egallab olgandan keyin qanday harakat qilishi borasida bir nechta taxminlar mavjud.
Birinchi variant: Rossiya harbiy qo‘mondonligi Donetsk viloyatining g‘arbida o‘z bo‘linmalarini saqlab qolib, Donetsk va Dnepropetrovsk viloyatlari ma’muriy chegarasi tomon hujumni davom ettirishga qaror qilishi mumkin. Bu Rossiya uchun ma’muriy chegaraga iloji boricha tezroq yetib borish boshqa yo‘nalishlardagi hujumlardan ko‘ra muhimroq ekanini anglatadi.
Ikkinchi variant: Rossiya qo‘mondonligi Velikaya Novoselka yaqinida ayrim kuchlarni saqlab, cheklangan hujumlarni davom ettirish orqali Ukraina qo‘shinlarini bu hududda band qilib turishi mumkin. Shu bilan birga, o‘z kuchlarining asosiy qismini boshqa front chizig‘iga ko‘chirish ehtimoli ham mavjud.
“Rossiya qo‘shinlari hozirda Kupyansk, Borovoy, Chasov Yar, Toretsk va Pokrovsk yo‘nalishlarida hujum operatsiyalarini kuchaytirmoqda. Shu bilan birga, ular Ukraina kuchlarining Kuraxov yo‘nalishi va Kursk viloyatidagi qoldiqlarini bartaraf etish bilan shug‘ullanmoqda”, deb yozadi tahlilchilar.
Uchinchi variant: Ukraina rasmiylari Rossiya joriy yili Zaporojye viloyatida intensiv jangovar harakatlarni qayta boshlashga urg‘u berishi mumkinligi haqida ogohlantirdi.
Tahlilchilarning fikricha, Rossiya harbiy qo‘mondonligi o‘z kuchlarini sanalgan yo‘nalishlarning istalganiga tashlashi mumkin. Bu esa, o‘z navbatida, Rossiya qo‘mondonligining bahor va yoz mavsumi uchun ustuvor yo‘nalishlarini ko‘rsatib beradi.
Velikaya Novoselkada nimga gap?
Rossiya qo‘mondonligi Donetsk viloyatida joylashgan qishloqni to‘liq egallaganini da’vo qilmoqda. RF Mudofaa vazirligi mazkur aholi punktida yozib olingani aytilgan videoni e’lon qildi. Unda askarlar bino tomiga o‘z bayroqlarini o‘rnatayotganini ko‘rish mumkin.
Ammo Ukraina Qurolli kuchlarining Donbassga mas’ul “Xortitsa” operativ-strategik guruhiga ko‘ra, mazkur aholi punkti uchun janglar davom etyapti.
Ukraina quruqlik kuchlari 110-brigada vakillari ta’kidlashicha, Rossiya Velikaya Novoselkadan so‘ng hujumni davom ettira olmaydi, chunki ular qiyin to‘siq — Mokriye Yali daryosi bilan to‘qnash kelgan.
Izoh (0)