AQSH prezidenti Jo Bayden Xalqaro jinoiy sudning (XJS) Isroil bosh vaziri Binyamin Netanyaxu va sobiq mudofaa vaziri Yoav Galantni hibsga olish to‘g‘risidagi orderini tanqid qildi. Bu haqda Oq uy matbuot xizmati xabar berdi.
Baydenning so‘zlariga ko‘ra, Isroil va Falastinning HAMAS harakati o‘rtasida tenglik mavjud emas.
Xalqaro jinoyat sudining (XJS) Isroil rahbariyatiga qarshi hibsga olish orderini chiqarishi g‘azablanarli holat. Yana bir bor aniqlik kiritmoqchiman: Isroil va HAMAS teng emas. Biz doimo Isroilning xavfsizligiga bo‘lgan tahdidlarga qarshi uning yonida turamiz, deyiladi bayonotda.
Oq uy matbuot kotibi Karin Jan-Pyer esa XJS tergovining jiddiyligiga AQSH shubha bildirishini aytdi.
Prokuror Isroilga konstruktiv hamkorlik qilish va o‘z ichki jarayonlarini tegishli tarzda ko‘rib chiqish uchun muhim imkoniyat bermadi. Bu esa prokurorlar tomonidan o‘tkazilgan tergov va ular bugun qabul qilgan qarorning ishonchliligiga shubha tug‘dirmoqda, dedi u.
Netanyaxuni hibsga olish orderi
21-noyabr kuni XJS Isroil bosh vaziri Binyamin Netanyaxu va mamlakatning sobiq mudofaa vaziri Yoav Galantga G‘azo sektoridagi ehtimoliy harbiy jinoyatlari uchun qamoqqa olish orderini chiqardi.
XJS prokurori Karim Xon may oyida Netanyaxu va Galant 2023-yil oktyabr oyida boshlangan G‘azo sektoridagi harbiy harakatlar davomida sodir etilgan harbiy va insoniyatga qarshi jinoyatlar uchun javobgar ekanini aytdi.
Yevropa diplomatiyasi rahbari Jozep Borrel XJSning Netanyaxu va Galantni qamoqqa olish uchun order chiqarish to‘g‘risidagi qarori Yevropa Ittifoqining barcha mamlakatlari uchun majburiy ekanini ta’kidladi.
Izoh (0)