Kecha, 15-yanvar kuni tunda AQSH prezidenti Jo Bayden AQSH, Misr va Qatarning diplomatik sa’y-harakatlari natijasida Isroil va HAMAS o‘rtasida o‘t ochishni to‘xtatish va garovga olinganlarni ozod qilish bo‘yicha kelishuvga erishilganini ma’lum qildi.
Bu haqda Jo Bayden prezidentlikdan ketishdan oldin xalqqa qilgan murojaatida aytib o‘tdi.
“Bugun AQSH, Misr va Qatarning jadal diplomatiyasi natijasida Isroil va HAMAS o‘t ochishni to‘xtatish va garovga olish bo‘yicha kelishuvga erishdi”, dedi u o‘z bayonotida.
Bitimning G‘azodagi “janglar”ga chek qo‘yishini, mahbuslarni ozod qilishini va falastinliklarga kerak bo‘lgan gumanitar yordamni taqdim etishini ta’kidlagan Bayden, Vashingtonning o‘t ochishni to‘xtatish haqidagi xabarni olqishlashini aytdi.
“Mojarolarga barham berish va tinchlik hamda xavfsizlikni o‘rnatishni allaqachon boshlash kerak edi”, dedi u.
Shuningdek, AQSHning amaldagi prezidenti mahbuslar ozod etilishidan, ayniqsa, xursand ekanligini qo‘shimcha qildi.
Bayonot tugaganidan so‘ng jurnalistlardan biri: “Urushni to‘xtatishda kimning xizmatlari katta bo‘ldi? Siznimi yoki Trampnimi?” deb savol berdi. Bayden esa: “Bu hazilmi?” deb istehzo bilan javob berdi.
Isroil hukumati rahbari idorasi xabar berishicha, bu xabardan keyin Netanyaxu Tramp bilan telefon orqali suhbatlashgan.
“Bosh vazir AQSHning saylangan prezidenti Trampga garovga olinganlarni ozod qilishda ko‘rsatgan yordami uchun minnatdorchilik bildirdi. Bosh vazir garovdagilarni har qanday yo‘l bilan bo‘lsa ham, qaytarishga hamisha tayyor bo‘lganini aytdi. Shuningdek, Trampning G‘azo endi hech qachon terrorizmga boshpana bo‘lmasligi uchun Qo‘shma Shtatlar Isroil bilan hamkorlik qilishi haqidagi gaplarini olqishlashini ma’lum qildi”, deyiladi xabarda.
Tomonlar, shuningdek, G‘azo atrofidagi vaziyat va boshqa muhim masalalarni muhokama qilish uchun Vashingtonda “yaqin vaqt ichida” uchrashuv o‘tkazishga kelishib oldilar, deya qo‘shimcha qildi idora.
Dunyo jamoatchiligi bu xabardan so‘ng urushni to‘xtatishda Baydendan ko‘ra Trampning hissasi katta bo‘lgan, degan xulosga keldi.
Isroil hukumati rahbari idorasi xabar berishicha, Netanyaxu Tramp bilan suhbatdan so‘ng AQSHning amaldagi prezidenti Jo Baydenga ham qo‘ng‘iroq qilgan. Suhbatda Isroil bosh vaziri Baydenga “garovga olinganlarni ozod qilish bo‘yicha kelishuvni ilgari surgani uchun minnatdorchilik bildirdi”, deyiladi idora xabarida.
Izoh (0)