G‘azo sektoridagi mojaro tomonlari o‘t ochishni to‘xtatish vaqtini kelishib oldilar, deb xabar berdi Qatar Tashqi ishlar vazirligi vakili Majid al-Ansari X ijtimoiy tarmog‘idagi sahifasida.
O‘t ochishni to‘xtatish joriy yilning 19-yanvar kuni mahalliy vaqt bilan soat 8:30 da boshlanadi. Vazirlik vakili aholini ehtiyot choralariga rioya qilishga va hokimiyat ko‘rsatmalarini kutishga chaqirdi.
2023-yil noyabr oyida Doha Falastin harakati va Isroil vakillari uchrashuvi uchun maydon bo‘ldi. O‘shanda tomonlar vaqtinchalik o‘t ochishni to‘xtatish haqida kelishgan edi. Natijada 105 nafar isroillik garovga olinganlar Isroil qamoqxonalaridagi 240 nafar falastinlik mahbuslarga almashtirilgan.
Isroil hukumati G‘azo sektorida o‘t ochishni to‘xtatish uchun ovoz berdi va anklavdagi garovga olinganlarni ozod qilish jarayonini boshladi. Avvalroq Falastinning HAMAS harakati bilan urushni to‘xtatish haqidagi kelishuv Isroil harbiy idoralari tomonidan ma’qullangan edi.
The Times of Israel nashrining yozishicha, 24 vazir yoqlab, sakkiz nafari qarshi ovoz bergan. HAMAS bilan kelishuv birinchi 3 nafar garovga olingan asirlikdan ozod etilgandan so‘ng kuchga kirishi kerak. Yana 30 kishi 42 kun ichida ozod qilinadi.
Yig‘ilishda Isroil bosh vaziri Binyamin Netanyaxu Qo‘shma Shtatlar HAMAS tomonidan kelishuvlar buzilgan taqdirda mamlakatga harbiy harakatlarni qayta boshlash kafolatini taqdim etganini aytdi.
“Prezident Tramp o‘z lavozimiga kirishgach, yetkazib berish to‘xtatilgan barcha qurollarni yana olishimizni ta’minlaydigan bo‘ldi”, deya qo‘shimcha qildi Netanyaxu.
15-yanvar kuni Qatar bosh vaziri Muhammad bin Abdulrahmon at-Tani Isroil va HAMAS o‘rtasidagi kelishuvni e’lon qildi. 17-yanvar kuni kelishuvni Binyamin Netanyaxu tasdiqladi.
Kelishuvning birinchi 42 kunlik bosqichida Isroil G‘azo sektoridan qo‘shinlarini olib chiqishni boshlaydi va HAMAS 33 nafar garovga olinganlarni ozod qiladi. Ikkinchi bosqichda barcha garovga olinganlarni ozod qilish, Isroil qo‘shinlarini to‘liq olib chiqib ketish va Isroildagi mingdan ortiq mahbuslarni ozod qilish nazarda tutiladi. Uchinchi bosqichda halok bo‘lganlarning jasadlari almashtiriladi.
Izoh (0)