Isroil G‘azodagi HAMAS va “Islom jihodi”ning 50 ta harbiy nishoniga hujum qildi

Isroil harbiy-havo kuchlari 16-yanvarda kun davomida G‘azo sektorining butun hududi bo‘ylab Falastinning HAMAS va “Islom jihodi” tashkilotlarining 50 ta harbiy nishoniga zarba berdi. Bu haqda armiya matbuot xizmatiga tayanib, TASS xabar berdi.

Idora hujumga uchragan nishonlar orasida harbiy komplekslar, qurol-yarog‘ omborlari, ishga tushirish qurilmalari, qurol ishlab chiqarish obyektlari va kuzatuv punktlarini sanab o‘tdi. Bundan tashqari, havo zarbalarida bir nechta qurolli shaxslar, jumladan, 2023-yil 7-oktyabr kuni Nova musiqa festivalida Isroilga hujumda qatnashgan HAMASning “Nuhba” maxsus bo‘linmasi a’zosi Zahedi Abu ar-Rus yo‘q qilindi.

“Zarbadan oldin tinch aholiga va fuqarolik infratuzilmasiga zarar yetkazish xavfini kamaytirish bo‘yicha choralar ko‘rilgan. HAMAS xalqaro huquqni buzgan holda Isroil davlatiga qarshi terrorchilik hujumlari uchun tinch aholidan foydalanishda davom etmoqda”, deya ta’kidladi matbuot xizmati.

Xabarda aytilishicha, armiya HAMAS va “Islom jihodi” kabi “terrorchi tashkilotlar” tahdidiga qarshi kurashishda davom etadi.

Ayni damda Qatarda G‘azo sektorini tartibga solish va garovga olinganlarni ozod qilish bo‘yicha muzokaralar o‘tkazilmoqda. Isroil hukumati rasmiy vakili Devid Menser HAMAS tomonidan ilgari surilgan yangi talablar tufayli kelishuv tafsilotlari hali ham to‘liq kelishilmaganini aytdi.

“Kelishuv tafsilotlari hali yakunlanmagan. Bizning muzokaralar jamoamiz Dohada yechim topish uchun sa’y-harakatlarni davom ettirmoqda”, dedi Menser.

Avvalroq Isroil bosh vaziri Binyamin Netanyaxuning idorasi HAMASni vositachilar bilan kelishilgan G‘azo bo‘yicha kelishuv bandlaridan voz kechishda va so‘nggi daqiqada yon berishga erishishga urinishda ayblagan edi. Idoraning ta’kidlashicha, Isroil vositachilar HAMAS shartnomaning barcha tafsilotlarini tasdiqladi deb xabar bermaguncha, uni tasdiqlash uchun harbiy-siyosiy kabinet va hukumat majlisini chaqirmaydi.

Menserning so‘zlariga ko‘ra, bu holat hozirgacha saqlanib qolmoqda.

“Isroil yakuniy kelishuvga erishilmaguncha ushbu muzokaralarning muvaffaqiyatini rasman e’lon qilmaydi”, dedi vazirlar mahkamasi spikeri.