Amerikalik milliarder Ilon Mask AQSHning saylangan prezidenti Donald Trampning Mar-a-Lagodagi (Florida shtati) qarorgohida tashkil etilgan Yangi yil gala-ziyofatida ishtirok etdi. Bu haqda Reuters xabar berdi.
Nashrning aniqlik kiritishicha, bayramda amerikalik senator Ted Kruz (Texas shtatidan respublikachi) va Trampning boshqa tarafdorlari ham qatnashgan.
Kirib kelgan 2025-yil “buyuk yil” bo‘ladi. Biz mamlakat sifatida hayratlanarli darajada muvaffaqiyatga erishamiz, deydi Tramp.
Yangi yilda o‘z oldiga qanday maqsadlar qo‘yishi haqidagi savolga javob berarkan, respublikachi “hamma baxtli, sog‘lom va farovon bo‘lishini istashi”ni aytgan. Keyinroq Tramp sahnaga chiqib, yig‘ilganlarga “prezident sifatida a’lo darajada ishlashga” va’da bergan. Uning inauguratsiyasi 20-yanvar kuni bo‘lib o‘tadi.
Avvalroq Bloomberg nashri AQSHdagi prezidentlik saylovlarida Tramp g‘alaba qozonganidan keyin tadbirkorning mulki keskin oshgani haqida xabar bergan edi. Bloomberg milliarderlar indeksiga ko‘ra, SpaceX asoschisining kapitali 439,2 milliard dollarni tashkil etmoqda. Bloomberg nashriga ko‘ra, Mask boyligi 400 milliard dollardan oshgan birinchi odam bo‘ldi.
Mask, shuningdek, Trampning bo‘lajak hukumatida ham o‘rin egalladi. The New York Times federal hujjatlarga tayanib yozganidek, milliarder Tramp saylovda g‘alaba qozonishi uchun 250 million dollardan ortiq mablag‘ sarflagan.
Bloomberg’ning aniqlik kiritishicha, Tesla aksiyalari o‘zini o‘zi boshqaradigan avtomobillar uchun qoidalarni soddalashtirish va kompaniya raqobatchilari uchun soliq imtiyozlarini bekor qilish kutilayotgan bir vaqtda 65 foizga oshdi. Shuningdek, Maskning sun’iy intellekt sohasidagi xAI startapi narxi ikki baravar ko‘proqqa baholanmoqda.
Uning qiymati prezidentlik saylovlari tugaganidan keyin 50 milliard dollarga yetgan edi
Izoh (0)