AQSHning saylangan prezidenti Donald Tramp Oq uy matbuot kotibi lavozimiga 27 yoshli Kerolin Levitt nomzodini ilgari surdi.
Bungacha u Respublikachilar prezidentlik kampaniyasida matbuot kotibi va uning avvalgi ma’muriyati davrida matbuot kotibi yordamchisi bo‘lib ishlagan.
Tramp Levittni aqlli va qattiqqo‘l deb atadi. “Men u o‘z vazifasini a’lo darajada bajarishiga va Amerika xalqiga bizning xabarimizni yetkazishda yordam berishiga ishonchim komil”, dedi saylangan prezident.
Trampning yangi jamoasi
Donald Trampning inauguratsiyasi yanvarda bo‘ladi. Respublikachi davlat kotibi lavozimiga Marko Rubioni, Milliy xavfsizlik bo‘yicha maslahatchi lavozimiga Mayk Vals nomzodini ilgari surgan. Pit Xegset mudofaa vaziri, kichik Robert Kennedi — sog‘liqni saqlash vaziri, Mett Geyts — adliya vaziri, Tulsi Gabbard — Milliy razvedka boshlig‘i bo‘lishi mumkin.
Shuningdek, amerikalik milliarder Ilon Mask va tadbirkor Vivek Ramasvami saylangan prezident Donald Tramp davrida davlat samaradorligini oshirish bo‘yicha yangi departamentga rahbarlik qilishi ma’lum bo‘lgandi.
Shu bilan birga, Ilon Mask o‘z manfaatlarini ilgari surishi Tramp jamoasiga yoqmayotgani haqida xabarlar paydo bo‘ldi.
Ilon Maskning Donald Tramp yonida doimiy ravishda hozir bo‘lishi siyosatchining ishonchli vakillarini va uning jamoasini g‘azablantira boshladi, deyiladi NBC telekanali xabarida.
Telekanal suhbatdoshlaridan biriga ko‘ra, Ilon Mask “Mar-a-Lagoda (Trampning Floridadagi qarorgohi) haddan tashqari uzoq qolib ketdi”. Milliarder u yerda muntazam respublikachining saylovdagi g‘alabasiga o‘zini sababchi deb ko‘rsatmoqda va siyosatchini o‘ziga “qarzdor” qilishga urinmoqda.
Saylangan prezidentning atrofidagilar bu holatdan bezovtalana boshlagan, deydi manbalar.
Izoh (0)