Jo Baydenning inauguratsiyasi qanday o‘tkaziladi? Unda AQSh tarixida birinchi marta harbiylar tomoshabinlardan ko‘proq bo‘ladi

AQShning 46-prezidenti Jo Bayden va 49-vitse-prezidenti Kamala Xarrisning inauguratsiyasi Vashingtonda 20-yanvar, chorshanba kuni tushga yaqin (Toshkent vaqti bilan soat 22:00 atrofida) boshlanadi, deb yozadi Meduza.

Koronavirus va ommaviy tartibsizliklar ehtimoli tufayli an’anaviy marosimga ko‘plab o‘zgartirishlar kiritildi. Marosim qatnashchilari soni qat’iyan cheklangan: Kongressning har bir a’zosi (538 kishi) o‘zi bilan bir kishi olib kelishi mumkin.

Odatdagidek, inauguratsiyaga avvalgi prezidentlar — Bill Klinton, kichik Jorj Bush va Barak Obama tashrif buyuradi. Jimmi Karter (keksaligi sababli) va Donald Tramp (shunchaki istamaganligi uchun) kelmaydi.

O‘rab olinadigan hudud ichkarisiga ko‘pi bilan jami uch ming kishi kiritiladi — bu Franklin Ruzveltning to‘rtinchi muddatidan buyon kuzatilgan eng ixcham inauguratsiya marosimi bo‘ladi. Odatda Linkoln yodgorligidan Kapitoliygacha bo‘lgan Milliy xiyobonda to‘planadigan oddiy tomoshabinlar o‘rniga 200 mingta AQSh bayrog‘i o‘rnatildi — ular ramziy ma’noda marosimga kelmaydigan tashrifchilarni anglatadi va koronavirus oqibatida vafot etganlarni xotirlaydi.

Xavfsizlik choralari mislsiz: Vashingtonga 25 mingdan ortiq Milliy gvardiya jangchisi joylashtirilgan, markaziy tumanlar to‘silgan, u yerlarda metro stansiyalari ishlamayapti. Qasamyod qabul qilish marosimi 1981-yildan buyon an’anaga aylangan tarzda Kapitoliyning g‘arbiy qanotida bo‘lib o‘tadi, so‘ng parad prezident va vitse-prezidentni Pensilvaniya-avenyu orqali Oq uydagi qarorgohlariga kuzatib qo‘yadi.

Marosimda AQSh madhiyasini Ledi Gaga kuylaydi, undan keyin Jennifer Lopes qo‘shiq aytadi. Bayram konserti virtual formatda bo‘lib o‘tadi.

Ma’lumot uchun: AQSh prezidentlari soni vitse-prezidentlar soniga teng emas, chunki prezidentning butun karyerasi davomida bir nechta o‘ng qo‘llari bo‘lishi mumkin. Masalan, Richard Nikson davrida ikki nafar, Franklin Ruzvelt davrida esa uch nafar vitse-prezident bo‘lgan.